Autoritetet boliviane njoftuan se do t’i përzë nga shteti ambasadoren e Meksikës dhe dy diplomatë spanjollë pas një incidenti të tensionuar në rezidencën e diplomatit meksikan.
Prej të premtes, kur ndodhi incidenti, Spanja ka marrë masa reciproke ndaj Bolivisë, ndërsa Meksika ka thënë se e ka tërhequr vetë ambasadoren për shkak të shqetësimeve për sigurinë e saj personale.
Por çfarë e ka shkaktuar këtë tensionim marrëdhëniesh mes këtyre shteteve?
Burimi i këtij konflikti është te ish-presidenti Evo Morales, i cili ka fituar azil politik në Meksikë në nëntor të këtij viti pas largimit nga atdheu shkaku i trazirave.
Meksika gjithashtu e ka hapur rezidencën e ambasadores së vet në Bolivi për strehimin e bashkëpunëtorëve të Moralesit dhe kjo ka nxitur protesta nga kundërshtarët e ish-presidentit.
Marrëdhëniet mes këtyre vendeve janë tensionuar prej asaj kohe. Bolivia tash po drejtohet përkohësisht nga Jeanine Anez, e cila më parë ndodhej në opozitë.
Ajo ka marrë masa shtypëse ndaj përkrahësve të ish-presidentit Morales dhe ka lëshuar fletarrestim për njërin prej ish-ministrave të tij, shkruan “BBC”, transmeton Gazeta Express.
