Paris Saint-Germain e ka kthyer në zakon blerjen e lojtarëve nga Barcelona gjatë dekadës së fundit, dhe duket se sërish gjigantët francezë po përpiqen të “rrëmbejnë” një tjetër futbollist të klubit katalanas. Ndërkohë, Barcelona po e ndien presionin e kohës për të siguruar vazhdimësinë e skuadrës.

Sipas një raporti nga L’Equipe, të cituar edhe nga Diario AS, PSG është e interesuar të nënshkruajë me mbrojtësin Eric Garcia. 24-vjeçari ka kontratë me Barcelonën vetëm deri verën e ardhshme dhe ndodhet më pak se dy muaj larg nga mundësia për të firmosur paraprakisht me klubin francez, që do ta transferonte atë si lojtar të lirë.

Luis Enrique, i cili e njeh mirë Garcian nga periudha kur drejtonte përfaqësuesen e Spanjës, është një admirues i tij. Megjithatë, raportet thonë se Barcelona mbetet e sigurt se do të arrijë ta bindë mbrojtësin të rinovojë kontratën në javët në vijim.

Nuk është hera e parë që PSG shfaq interes për Garcian. Ai ishte kandidati i radhës për të marrë një ofertë rinovimi menjëherë pas Frenkie de Jong, i cili firmosi kontratën e re. Në shtator u raportua se Barcelona dhe Garcia kishin rënë dakord për kushtet e një marrëveshjeje pesëvjeçare, me synimin për ta finalizuar para fundit të vitit kalendarik. Por në dy muajt e fundit duket se nuk ka pasur shumë progres.

Që nga janari, trajneri Hansi Flick i ka dhënë Garcias gjithnjë e më shumë hapësirë, fillimisht si mesfushor emergjent, më pas si mbrojtës i djathtë, dhe këtë sezon në pozicionin e tij natyral si qendërmbrojtës. Deri tani, ai ka qenë titullar përkrah Pau Cubarsit, ndërsa Flick shpesh ka lavdëruar karakterin dhe cilësitë e tij teknike.

Këtë sezon, Garcia ka zhvilluar 15 paraqitje dhe ka luajtur 1,121 minuta, më shumë se çdo lojtar tjetër i Barcelonës, një tregues i qartë i rëndësisë në rritje që ka marrë në skuadrën katalanase.