Me frikën se Adrien Rabiot mund të mungojë për një muaj, AC Milan po shikon drejt Ruben Loftus-Cheek për ta zëvendësuar atë, në vend të Samuele Ricci.

Mesfushori francez u rikthye nga grumbullimi me Kombëtaren e Francës duke vuajtur një problem muskulor.

Sipas testeve të kryera sot, është konfirmuar një dëmtim në muskujt soleus të këmbës së majtë, dhe gjendja e tij do të rishikohet pas 10 ditësh.

Kjo do të thotë se Rabiot do të mungojë të paktën dy javë, por Sky Sport Italia, Calciomercato.com dhe L’Équipe raportojnë se skenari më i mundshëm është një mungesë prej një muaji para se ai të rikuperohet plotësisht.

Rabiot ka pasur një ndikim të madh në mesfushën e Milanit që nga transferimi i tij në ditën e fundit të merkatos nga Olympique Marseille, ndaj tani Max Allegri duhet të bëjë ndryshime.

Sipas raportimeve të para, Loftus-Cheek pritet të marrë vendin e tij kundër Fiorentinës këtë fundjavë.
Fillimisht ishte shpresuar që ky dëmtim do t’i jepte një mundësi Samuele Ricci-t për të shkëlqyer, por ish-lojtari i Torinos mbetet ende larg formacionit titullar.

Një tjetër alternativë mund të ishte Ardon Jashari, por mesfushori me origjinë shqiptare është ende në proces rikuperimi nga një frakturë në fibulë./GazetaExpress/