Procedura urgjente me të cilën shumica qeverisëse në Kuvendin e Serbisë po synon miratimin e ndryshimeve në pesë ligje që rregullojnë sistemin e drejtësisë përbën një hap të hapur në drejtim të kundërt nga standardet e Bashkimit Evropian. Ndryshimet po miratohen pa respektuar procedurat ligjore dhe pa përfshirjen e Këshillit të Lartë Gjyqësor dhe Këshillit të Lartë të Prokurorisë, çka minon pavarësinë e institucioneve dhe sigurinë juridike në vend.

Sipas informacioneve të revistës Radar, këto ndryshime ligjore do të ngadalësonin ose do të bllokonin dhjetëra procese gjyqësore, kryesisht ato që lidhen me korrupsionin e nivelit të lartë. Amendamentet ndaj Ligjit për Prokurorinë Publike parashikojnë dobësimin serioz të Prokurorisë për Krim të Organizuar, duke lënë këtë institucion pa më shumë se gjysmën e prokurorëve dhe duke ndalur hetimet ndaj zyrtarëve të lartë të pushtetit dhe grupeve të krimit të organizuar.

Radar paralajmëron se në numrin e ardhshëm të revistës do të publikojë dëshmi dhe dokumente deri më tani të papublikuara, të cilat tregojnë se tragjedia në Novi Sad, ku u shemb streha e Stacionit Hekurudhor dhe humbën jetën 16 persona, nuk ishte pasojë vetëm e gabimeve teknike gjatë rindërtimit, por edhe e korrupsionit. Sipas këtyre dokumenteve, autoritetet kishin informacion të mjaftueshëm për rrezikun, por zgjodhën ta injoronin atë.

Në të njëjtën kohë, gazetarët e Radar-it kanë mësuar se biznesmeni Miroslav Mishkoviq, pronar i “Delta Holding”, ka paditur shtetin e Serbisë dhe ka kërkuar dëmshpërblim prej 1.2 milionë eurosh për arrestim të pabazë. Procesi gjyqësor është ende në zhvillim, ndërsa një procedurë tjetër e lidhur me të njëjtin rast ka përfunduar me refuzimin e kërkesës së kompanisë Delta për rreth 12.5 milionë euro.

Sipas Radar, këto zhvillime dëshmojnë se, pavarësisht deklaratave zyrtare për integrim evropian, Serbia po ndërmerr hapa që dobësojnë sundimin e ligjit, forcojnë pandëshkueshmërinë dhe e largojnë vendin gjithnjë e më shumë nga standardet e Bashkimit Evropian.