Sulmuesi i Chelseat, Raheem Sterling, është në bisedime për një transferim të mundshëm këtë verë, sipas një raporti të ri – dhe kjo lëvizje mund të bëhet klubi i pestë i Premier League në karrierën e tij deri më tani.
30-vjeçari, i cili verën e kaluar refuzoi një nga kontratat më të mëdha të ofruara ndonjëherë – me vlerë 650 mijë £ në javë – e kaloi sezonin 2024/25 i huazuar te Arsenali.
Në total, ai zhvilloi 28 paraqitje në të gjitha garat nën drejtimin e Mikel Artetës, duke shënuar një gol dhe dhënë pesë asistime, por “Topçinjtë” vendosën të mos e bënin transferimin të përhershëm.
Sterling është kthyer te Chelsea, por klubi duket se ka bërë të qartë që dëshiron ta shesë këtë verë. Aktualisht, ai po stërvitet i ndarë nga pjesa tjetër e skuadrës së parë të Enzo Maresca-s, ndërsa disa klube po shqyrtojnë mundësinë për të bërë ofertë për ish-sulmuesin e Liverpool dhe Manchester City.
Sipas talkSPORT, Crystal Palace është i interesuar, ndërsa edhe gjigantët e Serie A, Juventus, po e ndjekin situatën. Megjithatë, duket se Fulham i Marco Silvës është favorit për ta transferuar. Sipas FourFourTwo, Sterling është në bisedime me Fulham për një kalim në “Craven Cottage” përpara ndeshjes së hapjes së Premier League ndaj Brighton.
Një javë para huazimit të tij te Arsenali, trajneri Maresca kishte dhënë një vlerësim të qartë për të ardhmen e Sterling:
“Nuk po them se Raheem nuk është një lojtar i mirë, por unë preferoj lloje të tjera anësorësh. Kjo është arsyeja,” kishte deklaruar ai, pasi Sterling nuk ishte përfshirë në ndeshjen hapëse të Premier League kundër Manchester City.
“Kam folur me Raheem, vetëm unë dhe ai, një ditë para ndeshjes me City dhe ia shpjegova saktësisht situatën. Nuk e kam parë Raheem pas ndeshjes. Në këtë moment, ai dhe Ben Chilwell po stërviten të ndarë. Situata e tyre është mjaft e qartë. Nuk ka asnjë përditësim të ri për ta.”
Maresca shtoi: “Në rast se do të ulem me Raheem, do t’i them saktësisht të njëjtat gjëra që tashmë ia kam thënë. Nuk kam asgjë të re për t’i treguar sepse kam qenë mjaft i qartë.”/GazetaExpress/
