Drita e ka fituar ndeshjen e parë të raundit të parë kualifikues në Ligën e Kampionëve.
Kampionia e Kosovës triumfoi minimalisht 1:0 në “Fadil Vokrri” ndaj ekipit nga Luksemburgu, Differdange.
Pas ndeshjes, trajneri i Dritës, Zekirija Ramadani për Kohën tha se është i kënaqur me rezultatin.
Deklarata e plotë:
“Rezultati është pozitiv. Goli erdhi me vështirësi. Kundërshtari u pa që ka disiplinë taktike. Nuk është rastësisht ekipi i vetëm në botë që nuk ka pësuar asnjë gol në ndeshjet në shtëpi.
Ndeshja e parë, si për ne si për ata dhe presioni ishte në anën tonë. Por e pamë që kishim përballë një kundërshtar cilësor.
Jam i kënaqur me këtë rezultat dhe tani e kemi më të lehtë pasi mund ta analizojmë ndeshjen. Mund t’i përmirësojmë gabimet që i kemi bërë.
Duhet të luftojmë më tepër se sonte. I kuptoj lojtarët që mund të jetë vështirë. Por duhet të luftojmë më tepër, të vrapojmë më tepër. Goli i shënuar mund të na ndihmoi të krijojmë hapësirë në mbrojtjen e kundërshtarit në ndeshjen e kthimit. Mund të jetë goli i kualifikimit”.
