Sipas La Repubblica, José Mourinho ka qenë një kandidat serioz për të marrë drejtimin e kombëtares italiane, me sponsorin teknik të Azzurrëve të gatshëm të mbulonte një pjesë të pagës së tij, por Shefi i Delegacionit, Gigi Buffon, ka kundërshtuar emërimin e tij.

Trajneri aktual i Fenerbahçes, Mourinho, ishte një alternativë reale për të zëvendësuar Luciano Spallettin si trajner i Italisë, sipas raportit të La Repubblica. Madje, Adidas – sponsori i Italisë dhe i Mourinhos – ishte i hapur për të mbuluar pjesërisht pagën e tij.

Megjithatë, Federata Italiane e Futbollit (FIGC) u përball me dy pengesa të mëdha. Së pari, Fenerbahçe nuk ishte e gatshme ta linte Mourinhon të largohej pa një pagesë transferimi. Së dyti, Gigi Buffon – Shefi i Delegacionit të Italisë – nuk ishte dakord me emërimin e ish-trajnerit të Romës dhe Interit.

Sipas raportit, legjenda e Azzurrëve besonte se kombëtares i duhej një figurë tjetër – një legjendë e vërtetë italiane – për të pasuar Spallettin dhe për të rritur shpresat e kualifikimit në Kupën e Botës 2026.

Burime të mëhershme pretendonin se Buffon kishte kërcënuar me dorëheqje nëse Italia do të kthente Roberto Mancinin. Por vetë Buffon e sqaroi këtë gjatë konferencës për shtyp të prezantimit të Gennaro Gattusos:
“Kontrata ime përfundon çdo vit më 30 qershor, kështu që dorëheqja nuk ishte çështje. Ne e zgjodhëm Rinon në konsultim me Presidentin dhe profesionistët e tjerë me të cilët folëm. Nuk besoj se ka trajnerë të mirë ose të këqij në këtë nivel, por trajnerë që janë funksionalë për atë që i nevojitet ekipit. Ishte momenti i duhur që Rino të bëhej trajner i kombëtares.

Këto janë përgjegjësi që dikush i merr. Koha do të tregojë nëse ishte vendimi i duhur apo jo. Nëse nuk ishte, atëherë bën një hap pas.”/GazetaExpress/