Një zyrtar nga misioni detar i Bashkimit Evropian, Aspides, tha se anijet kanë marrë transmetime VHF nga Garda Revolucionare e Iranit, duke thënë se "asnjë anije nuk lejohet të kalojë Ngushticën e Hormuzit", raportoi Reuters.

Agjencia e Operacioneve Tregtare Detare të Mbretërisë së Bashkuar tha gjithashtu se mori raporte të shumta nga anijet që operonin në Gjirin Persik, duke thënë se kishin marrë mesazhe mbi mbylljen e Ngushticës së Hormuzit.

Ngushtica është rruga më jetike e eksportit të naftës në botë, e cila lidh prodhuesit më të mëdhenj të naftës së Gjirit, si Arabia Saudite, Irani, Iraku dhe Emiratet e Bashkuara Arabe, me Gjirin e Omanit dhe Detin Arabik.

Siç raporton The Guardian, zyrtari i misionit detar ka deklaruar se Irani nuk e kishte konfirmuar zyrtarisht ndonjë urdhër të tillë. Teherani ka kërcënuar për vite me radhë të bllokojë rrugën e ngushtë ujore në hakmarrje për çdo sulm ndaj Republikës Islamike.