Sipas një raporti në Axios, administrata Trump po shqyrton pushtimin ose bllokimin e ishullit Kharg të Iranit për të ushtruar presion mbi Iranin që të rihapë ngushticën e Hormuzit.
Për këtë raport The Guardian tha se nuk ka qenë në gjendje ta verifikojë në mënyrë të pavarur dhe shtoi se aty citohen katër burime që të gjitha folën në kushte anonimiteti.
"Ai dëshiron që Hormuzi të hapet. Nëse duhet ta marrë ishullin Kharg që kjo të ndodhë, kjo do të ndodhë. Nëse vendos të ketë një pushtim bregdetar, kjo do të ndodhë. Por ky vendim nuk është marrë ende", tha një zyrtar i lartë i administratës për Axios.
"Gjithmonë kemi pasur ushtarë në terren në konflikte nën çdo president, përfshirë Trump. E di që kjo është një fiksim në media, dhe e kuptoj politikën, por presidenti do të bëjë atë që është e drejtë", tha një zyrtar i dytë i lartë.
Asnjë vendim nuk është marrë ende, tha zyrtari.
Kharg, një ishull koralor pesë milje i gjatë në Gjirin Persik, rreth 16 milje nga kontinenti, është një qendër kyçe përpunimi për Iranin, përmes të cilit zakonisht rrjedhin 90% e eksporteve të naftës së vendit. Ishulli kishte mbetur kryesisht i paprekur nga sulmet SHBA-Izrael gjatë dy javëve të para të luftës.
Por presidenti i SHBA-së, Donald Trump, pretendoi të shtunën se sulmet amerikane kishin "shkatërruar plotësisht" pjesën më të madhe të ishullit Kharg, duke i thënë NBC Neës se ushtria e saj mund të godasë vendin "disa herë të tjera vetëm për qejf".
