Tennis Australia ka thënë se ndien keqardhje për ndikimin që dëbimi i Novak Djokovicit e ka pasur te lojtarët e tenisit në turneun Australian Open.
Organizatori i turneut grand slam e pranoi se ka disa mësime që duhet t’i marrë nga e gjithë kjo tollovi, raporton Gazeta Express.
Tenisti serb Djokovic, i cili nuk është i vaksinuar kundër Covid-19, u dëbua nga Australia të dielën, pasi e humbi betejën në gjykatë për të qëndruar në këtë vend.
Tennis Australia tha se e respekton vendimin e gjykatës dhe shpreson se përqendrimi tani do të kthehet në fushat e tenisit.
“Si familje e Tennis Australia, ne e pranojmë se ngjarjet e fundit i kanë shpërqendruar dukshëm të gjithë. Ka gjithmonë mësime për t’u marrë dhe ne do t’i rishikojmë të gjitha anët e përgatitjeve dhe zbatimeve tona për të njoftuar për planet tona, siç bëjmë çdo vit”, thuhet në një njoftim të organizatorit të turneut Australian Open.
34-vjeçarit i ishte pranuar një përjashtim mjekësor nga marrja e vaksinës për të hyrë në Australi nga dy panele mjekësore - njëri i thirrur nga Tennis Australia dhe tjetri nga qeveria e shtetit të Victorias – pasi kishte dalë pozitiv në testin për koronavirus në mes të dhjetorit.
Megjithatë, Forca Kufitare e Australisë e ndaloi 20 herë fituesin e titujve grand slam më 5 janar për shkak se nuk i kishte plotësuar kërkesat e qeverisë federale për koronavirusin dhe si pasojë viza e tij u anulua.
Një gjykatë e shfuqizoi atë vendim, por qeveria ia anuloi vizën përsëri të premten, duke thënë se ishte në interes të publikut./Gazeta Express/
