Real Madrid udhëton drejt Alavés me një problem të madh në mbrojtje dhe me të ardhmen e trajnerit Xabi Alonso të varur pas rezultatit të së dielës. Kylian Mbappé ka udhëtuar me skuadrën, por trajneri nuk ka zbuluar nëse francezi do të nisë nga minuta e parë.

Mbappé, i cili ka kaluar një dëmtim të gishtit dhe më pas një problem muskulor, ishte në stol për humbjen 2-1 ndaj Manchester Cityt gjatë javës.

Alonso konfirmoi se Mbappé është i gatshëm për të luajtur, por vendimi për t’ia dhënë një vend titullari do të merret vetëm para ndeshjes.

Kriza më e madhe për trajnerin spanjoll është në mbrojtje. Nga lojtarët, vetëm Dean Huijsen, Raúl Asencio dhe Antonio Rüdiger janë të gatshëm, ndërsa dy të tjerë janë të pezulluar dhe disa të tjerë të lënduar. Për të plotësuar numrin, janë thirrur të rinjtë Joan Martínez (18 vjeç) dhe Víctor Valdepeñas (19 vjeç).

“Do të plotësojmë me lojtarë nga Castilla; kur vijnë, shtojnë cilësi në stërvitje, dhe ndaj Alavés do të shkojmë me ata që janë të gatshëm dhe që na ndihmojnë,” deklaroi Alonso.

Një humbje ndaj Alavés mund të rrezikojë seriozisht vendin e Alonso si trajner i Los Blancos, duke e vendosur spanjollin në një situatë delikate në Bernabéu. /GazetaExpress