Real Madridi shpreson t’i rikthehet fitoreve të shtunën, kur në “Santiago Bernabeu” pret Levanten, por përballja e La Ligës do ta gjejë pa shërbimet e yllit të sulmit, Kylian Mbappe.

Ka qenë një javë e vështirë për Real Madridin, i cili u mposht nga Barcelona në finalen e Superkupës së Spanjës dhe më pas u eliminua nga Kupa e Mbretit të mërkurën nga skuadra e Segunda-s, Albacete. Në këtë periudhë, Xabi Alonso u largua nga posti i trajnerit kryesor, vend që tani është marrë nga Alvaro Arbeloa.

Arbeloa do të drejtojë ndeshjen e tij të parë në shtëpi si trajner i Real Madridit, por ashtu si në debutimin ndaj Albacetes, do të jetë sërish pa Mbappen. Sipas “Marca”, sulmuesi francez nuk do të rrezikohet në “Bernabeu”, pasi ende ndjen shqetësime nga dëmtimi në gju që pësoi para pushimit dimëror.

Mbappe u stërvit gjatë seancës së së enjtes dhe nuk dukej se kishte probleme, por brenda klubit është vendosur që ai të mos aktivizohet ndaj Levantes. Ai luajti duke shtrënguar dhëmbët fundjavën e kaluar në humbjen e Superklasikos, por tani ekziston dëshira që të mos merren më rreziqe me rikuperimin e tij.

Mungesa e Mbappes pothuajse me siguri do të thotë se Gonzalo Garcia do të vazhdojë si sulmues titullar. 21-vjeçari ka lënë përshtypje shumë të mira në mungesë të francezit, me pesë gola në katër paraqitjet e fundit – përfshirë një hat-trick ndaj Real Betisit, një gol në El Clasico dhe një tjetër në humbjen e Kupës së Mbretit ndaj Albacetes.

Gonzalo do të synojë të vazhdojë formën e tij të mirë edhe kundër Levantes. Real Madridi ka nevojë urgjente të rikthehet te fitoret, megjithëse nuk do të jetë e lehtë ndaj një kundërshtari që është i pamposhtur në tre ndeshjet e fundit.