Real Madridi pritet të udhëtojë sot drejt Arabisë Saudite për të marrë pjesë në Superkupën e Spanjës, e cila zhvillohet më vonë gjatë kësaj jave.

“Los Blancos” do të përballen me rivalët e qytetit, Atletico Madridin, në gjysmëfinale më 8 janar, ndërsa një fitore do t’i siguronte një takim në finale të dielën ndaj Barcelonës ose Athletic Bilbaos.

Para udhëtimit drejt Xhedahut, trajneri Xabi Alonso ka publikuar listën e lojtarëve që do të udhëtojnë për këtë turne.

Lajmi kryesor është se Kylian Mbappe është lënë jashtë skuadrës, pasi Real Madridi ka vendosur të mos rrezikojë me golashënuesin e tij kryesor, i cili po rikuperohet nga një problem me ligamentet.

Në anën tjetër, Alonso ka marrë një shtysë pozitive me rikthimin e Dani Carvajal në skuadër, ndërsa edhe Trent Alexander-Arnold është përfshirë në listë, megjithëse ai ende mund të jetë larg rikthimit të plotë në fushë.

Dean Huijsen, i cili mungoi në ndeshjen e fundjavës ndaj Real Betisit për shkak të një problemi fizik, është rikuperuar dhe është përfshirë në skuadër.

Ndërkohë, të rinjtë David Jimenez dhe Thiago Pitarch kanë marrë gjithashtu ftesë nga Alonso për udhëtimin.