Real Madridi po vazhdon të ndjekë strategjinë e investimit në futbollistë adoleshentë me potencial të jashtëzakonshëm, siç u dëshmua së fundmi me transferimin e Endrick Felipe nga Brazili për një shumë prej 40 deri në 60 milionë euro. Emri më i ri që ka tërhequr vëmendjen e “Los Blancos” është Abdellah Ouazane, talenti 16-vjeçar i Ajaxit.

Ouazane është aktualisht pjesë e skuadrës U-19 të Ajaxit, por kontrata e tij përfundon në fund të muajit qershor. Kjo e ka bërë atë objekt interesimi nga një numër klubesh të mëdha evropiane. Me prejardhje marokene, ai u shpall së fundmi lojtari më i mirë i turneut në Kupën e Kombeve të Afrikës për moshat U-17, duke përfaqësuar Marokun pasi më herët kishte luajtur për kombëtaren U-15 të Holandës.

Interesimi i Real Madridit për Ouazane u raportua fillimisht nga gazetari Javier Rodriguez dhe u konfirmua nga gazeta Marca. Klubi madrilen ka zhvilluar bisedime fillestare me lojtarin dhe përfaqësuesit e tij, dhe megjithëse ende nuk është arritur një marrëveshje përfundimtare, optimizmi në “Santiago Bernabéu” është i madh.

Ouazane është një lojtar kreativ, që luan kryesisht pas sulmuesit ose në mesfushë. Nëse Reali arrin të sigurojë shërbimet e tij, do t’i paraprijë rivalëve të përjetshëm të Barcelonës, të cilët gjithashtu janë të interesuar për transferimin e tij. Sipas Sport, katalanasit e kanë ndjekur me vëmendje Ouazane, ashtu si edhe talentin norvegjez të Bodo/Glimt, Mikkel Bro Hansen (16 vjeç). Gjithashtu, Paris Saint-Germain raportohet se është futur në garë për të.

Plani i Real Madridit për Ouazane është që të aktivizohet fillimisht ose me ekipin U-19 ose me Castillan, e cila tani drejtohet nga ish-lojtari i njohur Alvaro Arbeloa. Krahasimet me Arda Güler nuk mungojnë – turku 20-vjeçar ka një profil të ngjashëm, dhe edhe pse më i pjekur, shihet si një shembull i rrugës që mund të ndjekë edhe Ouazane, i cili mund të synojë një vend në të ardhmen në formacionet e Xabi Alonsos.