Real Madridi duket se po fillon ta pranojë idenë e transferimit të një mesfushori këtë verë, pas largimeve të Luka Modrić dhe Toni Kroos gjatë dy viteve të fundit.
Fillimisht, “Los Blancos” kishin besim të plotë te talenti që tashmë ndodhej në skuadër, por dështimi i mesfushës për të funksionuar si duhet nën drejtimin e tre trajnerëve radhazi e ka ndryshuar perceptimin në “Santiago Bernabeu”.
Një nga arsyet pse Real Madridi nuk veproi në afatet e fundit kalimtare ishte fakti se nuk është e lehtë të gjesh një mesfushor të nivelit të Modrić apo Kroos. Në fillim të sezonit, klubi u lidh me mesfushorin holandez Kees Smit dhe yllin e Crystal Palace, Adam Wharton, por duket se interesimi për këtë të fundit është shuar. Tani, Reali po vlerëson opsionet e tij për verën.
Sipas The Athletic, Real Madridi kishte marrë një përgjigje pozitive nga rrethi i Alexis Mac Allister gjatë periudhës kur Carlo Ancelotti ishte në krye të skuadrës. Trajneri italian kishte kërkuar transferimin e mesfushorit të Liverpoolit, por klubi nuk e çoi më tej marrëveshjen. Aktualisht, Mac Allister ka edhe dy vite kontratë në “Anfield”, dy faktorë që mund ta lehtësojnë një marrëveshje të mundshme. Burimet bëjnë të ditur se ai vazhdon të vlerësohet shumë në “Bernabeu”.
Nuk është sekret se përforcimi ideal për Real Madridin do të ishte mesfushori i Paris Saint-Germain, Vitinha, ndërsa edhe Enzo Fernández i Chelseat është përmendur shpesh si objektiv i “Los Blancos”. Megjithatë, klubi beson se edhe nëse Fernández do të ishte i hapur për një transferim, aspekti financiar i marrëveshjes për cilindo prej tyre i bën këto transferime “pothuajse të pamundura”.
Pavarësisht vështirësive, Real Madridi ka insistuar se skuadra ka cilësinë e mjaftueshme për të garuar për La Ligën dhe Ligën e Kampionëve. Por, nëse asnjëra prej tyre nuk fitohet, presidenti Florentino Perez pritet të vihet nën presion për të investuar sërish. Ai ka ndryshuar trajnerin dhe përgatitësin fizik në mes të sezonit, në përpjekje për të nxjerrë maksimumin nga një skuadër e goditur shpesh nga dëmtimet.
