Gjatë viteve, Real Madrid dhe Barcelona kanë konkurruar shpesh për disa prej talenteve më të kërkuar të futbollit botëror, dhe së shpejti mund të përballen sërish për një tjetër yll të ri që po shkëlqen në Kampionatin Botëror U20.

Që nga viti i kaluar, Barcelona është raportuar se ka shfaqur interes për Gilberto Mora. Në moshën 15-vjeçare, ai u ftua për një provë te La Masia, por vendosi të qëndrojë në Meksikë me Tijuana, ku tashmë është një titullar i rregullt.

Në javët e fundit është raportuar se edhe Real Madrid po e ndjek me vëmendje zhvillimin e tij, me të dyja klubet që po monitorojnë paraqitjet e tij në Botërorin U20. Aty, pavarësisht se është vetëm 16 vjeç, Mora ka qenë një nga lojtarët më të spikatur, me 3 gola dhe 2 asistime në 5 ndeshje.

Mora po luan në sulm për përfaqësuesen e Meksikës U20, por në klub shpesh aktivizohet si mesfushor i majtë, ndërsa mund të luajë edhe në qendër të mesfushës. Kjo shumëanshmëri është një plus i madh për Realin dhe Barcelonën, që tashmë e dinë edhe çmimin e tij. Sipas raporteve nga Meksika (përmes Marca), Tijuana kërkon rreth 20 milionë dollarë (17.2 milionë euro) për ta lënë të largohet, por ajo shumë do të mbulonte vetëm 50% të të drejtave të tij.

Megjithatë, Mora nuk do të mund të transferohet në Evropë para janarit të vitit 2027, pasi ai mbush 18 vjeç vetëm në tetor të vitit të ardhshëm. Dhe kur të vijë koha për ta bërë hapin e madh, ka shumë gjasa që Real Madrid të jetë destinacioni i tij i preferuar. Këtë e ka konfirmuar edhe Ignacio Ruvalcaba, drejtori i akademisë së Tijuana-s:

“Gil Mora ka një ëndërr — të luajë për Real Madrid — por qëndron me këmbë në tokë. Ai gjithmonë sheh futboll dhe i pëlqen të ndjekë Real Madridin, sigurisht e imagjinon veten duke luajtur aty. Familja e tij është shumë e përqendruar, babai e ka menaxhuar shumë mirë, dhe shpresojmë ta shohim një ditë të ketë sukses në Evropë. Ai e do futbollin evropian dhe, sipas mendimit tim, ka cilësitë për të qenë pjesë e atyre ligave.”/GazetaExpress/