Rodrygo ka qenë një nga talentët më premtues te Real Madridi prej vitesh, por e ardhmja e tij te skuadra e bardhë duket se po largohet gjithnjë e më shumë nga “Santiago Bernabéu”.

Pas një fundsezoni të parregullt dhe një paraqitjeje të zbehtë në fazën e grupeve të Kupës së Botës për Klube, sulmuesi brazilian ka humbur rëndësinë brenda skemës së Xabi Alonsos.

Drejtuesit sportivë po e marrin seriozisht në konsideratë largimin e tij këtë verë.

Fillimisht, klubi madrilen vendosi një çmim afër 100 milionë euro, duke besuar se mosha e tij e re dhe potenciali do të tërhiqnin klubet më të mëdha të Evropës.

Megjithatë, realiteti i tregut ka qenë më i ftohtë nga sa pritej dhe palët e interesuara nuk kanë shfaqur gatishmëri për të arritur ato shifra.

Përballë këtij skenari, klubi po shqyrton mundësinë e uljes së pritshmërive financiare për të lehtësuar largimin e tij dhe për të zgjeruar gamën e destinacioneve të mundshme.

Në moshën 24-vjeçare, Rodrygo ende gëzon interes ndërkombëtar të konsiderueshëm, por konkurrenca e brendshme në skuadrën e “Los Blancos”, e kombinuar me shfaqjen e talenteve të rinj, i ka reduktuar mundësitë për të luajtur.

Mungesa e vazhdimësisë në formacion dhe ndjesia se ai nuk e ka shfrytëzuar plotësisht potencialin e tij kanë bërë që stafi teknik të kërkojë alternativa për pozicionin e tij.

Vetë lojtari, i vetëdijshëm për situatën, do të ishte i hapur për të marrë në konsideratë propozime që i garantojnë një rol kryesor dhe minuta loje.

Megjithëse largimi i tij nuk është më vetëm një mundësi, sfida për Real Madridin do të jetë gjetja e një blerësi të gatshëm për të përballuar një marrëveshje që, ndonëse nuk e arrin më çmimin fillestar, mbetet gjithsesi një shpenzim i konsiderueshëm.

Në zyrat e klubit e pranojnë se nuk mund të presin edhe shumë gjatë nëse duan të nisin me fleksibilitet procesin e rinovimit të repartit të sulmit./GazetaExpress/