Real Madridi vazhdon të përfitojë financiarisht nga ish-lojtarët e tij falë klauzolave të rishitjes, dhe viti 2026 pritet të sjellë një tjetër përfitim të madh për klubin mbretëror.

Një nga emrat kryesorë është Mario Gila, mbrojtësi spanjoll që u largua nga Madridi në verën e vitit 2022 dhe iu bashkua Lazios. Që prej atëherë, 25-vjeçari është shndërruar në një nga shtyllat e mbrojtjes së klubit italian, duke tërhequr interesin e disa skuadrave të mëdha.

Sipas Diario AS, AC Milan po përgatit një ofertë verore për Gilan, e cila pritet të arrijë vlerën rreth 20 milionë euro. Një transferim i tillë do të ishte lajm i shkëlqyer jo vetëm për Lazion, por edhe për Real Madridin.

Si pjesë e marrëveshjes së shitjes te Lazio, Real Madridi ka ruajtur një klauzolë 50% të rishitjes, praktikë e zakonshme për lojtarët e akademisë La Fábrica. Kjo do të thotë se, në rast të transferimit te Milani për 20 milionë euro, “Los Blancos” do të arkëtonin plot 10 milionë euro, pa pasur asnjë shpenzim shtesë.

Ky përfitim financiar pritet t’i ndihmojë drejtuesit madrilenë në planifikimin e merkatos së ardhshme, duke dëshmuar edhe një herë strategjinë afatgjatë dhe të suksesshme të klubit në menaxhimin e talenteve të veta. /GazetaExpress