Mbrojtësi i majtë i Milanit, Davide Bartesaghi, po impresionon këtë sezon në Serie A dhe progresi i tij nuk ka kaluar pa u vënë re nëpër Europë.

Real Madridi është klubi më i fundit që ka nisur ta monitorojë nga afër zhvillimin e tij.

Në tetor të këtij viti u raportua se Barcelona po i kushtonte vëmendje progresit të Bartesaghit. Që atëherë, interesimi i Arsenalit ishte tashmë i njohur.

Bartesaghi ka kontratë me Milanin deri në vitin 2030 dhe, si produkt i akademisë, “Rossonerët” me shumë gjasë nuk do të jenë të gatshëm ta humbasin kaq shpejt pas shpërthimit të tij në ekipin e parë.

Tani, sipas “Caught Offside”, edhe Real Madridi i është bashkuar listës së klubeve që po e ndjekin nga afër mbrojtësin e majtë.

Përveç Barcelonës dhe Arsenalit, edhe Manchester City dhe Bayern Munich janë të njohur me aftësitë e tij.

Adoleshenti është tashmë pjesë e rregullt e përfaqësueses U21 të Italisë dhe ka zhvilluar 13 ndeshje me ekipin e parë të Milanit, duke shënuar dy gola dhe një asist.

Milani është kundër çdo shitjeje në janar dhe synon ta mbajë për momentin.

Megjithatë, është përmendur një çmim rreth 45 milionë euro për verën. Thuhet se Arsenali është klubi më i interesuar për talentin italian.

Real Madridi mund të jetë në pozicion për të nënshkruar së shpejti një tjetër mbrojtës të majtë, në varësi të asaj që do të ndodhë me lojtarët aktualë në atë pozicion.

Përforcimi i verës, Alvaro Carreras, shihet si një opsion afatgjatë në “Bernabeu”, por ka më shumë pikëpyetje rreth Ferland Mendyt dhe Fran Garcias.

Francezi ishte një kandidat potencial për t’u shitur verën e kaluar dhe sërish ka hyrë në një cikël dëmtimesh, ndërsa mbështetësi i tij më i madh ishte Carlo Ancelotti.

Garcia ka kontratë deri në vitin 2027 dhe Real Madridi do të duhet të marrë një vendim për të ardhmen e një lojtari që nuk ka luajtur shpesh këtë sezon./GazetaExpress/