Real Madrid duket se do të vazhdojë politikën e saj të joshjes së lojtarëve me profil të lartë pa kosto transferimi dhe dy skuadra të Ligës Premier mund të dalin të humbura nga kjo strategji. 

Në vitet e fundit, madrilenët kanë ndryshuar qasjen e tyre në afatin kalimtar, duke u fokusuar në lojtarë të mëdhenj që janë në përfundim të kontratave, për t’i sjellë në “Santiago Bernabeu” pa ndonjë tarifë transferimi. 

Në katër nga pesë afatet e fundit kalimtare, Real Madrid ka siguruar shërbimet e emrave të njohur pa paguar klauzola transferimi: David Alaba në vitin 2021, Antonio Rüdiger në 2022, Kylian Mbappé në 2024, dhe së fundmi Trent Alexander-Arnold nga Liverpool. 

Alexander-Arnold u bind të mos rinovonte kontratën me klubin e tij dhe të transferohej në kryeqytetin spanjoll në fund të sezonit.  

Megjithatë, për të siguruar që lojtari të jetë pjesë e skuadrës në Kupën e Botës për Klube, Real Madrid përfundimisht pranoi të paguajë një shumë simbolike prej 10 milionë eurosh për kartonin e tij. 

Pavarësisht investimeve të fundit në Dean Huijsen dhe Franco Mastantuono, raportet sugjerojnë se madrilenët tashmë kanë nisur përgatitjet për transferimin e radhës pa kosto – dhe dy klube angleze ndihen të kërcënuara. 

Sipas Marca, klubet kanë filluar të “frikësohen” nga kjo strategji e Real Madridit, ndërsa mbrojtësi i Liverpoolit, Ibrahima Konate, përmendet si objektivi kryesor. 

Raporti thekson se drejtuesit e Liverpoolit e kanë nuhatur një situatë të ngjashme me atë të Alexander-Arnold, pasi oferta e fundit për rinovim është refuzuar nga Konate, me kontratën aktuale që i skadon verën e ardhshme. 

Përveç tij, edhe mbrojtësi i Arsenalit, Myles Leëis-Skelly, është përmendur si një tjetër emër që mund të transferohet falas, së bashku me talentin e ri të Valencias, Cristhian Mosquera. 

Megjithatë, besohet se Konate është lojtari që Real Madrid e dëshiron më shumë për ta afruar në skuadër.