Shtetet e Bashkuara do t'ua dorëzojnë dy nga postet kryesore të komandës së NATO-s - në Napoli të Italisë dhe Norfolk të Virxhinias - oficerëve europianë, tha një burim ushtarak për Reuters të hënën.

Ky veprim është në përputhje me kërkesat e Presidentit të SHBA-së Donald Trump që kombet europiane të marrin më shumë përgjegjësi për sigurinë e tyre. Administrata e tij ka bërë thirrje që aleanca ushtarake, e dominuar prej kohësh nga Shtetet e Bashkuara, të bëhet një "NATO e udhëhequr nga Europa".

Si pjesë e riorganizimit të komandës, oficerët europianë do të marrin përsipër Komandën e Forcave të Përbashkëta Aleate të NATO-s në Napoli dhe Komandën e Forcave të Përbashkëta në Norfolk, të dyja aktualisht të udhëhequra nga admiralë amerikanë, tha burimi, duke folur në kushte anonimiteti, raporton Reuters, transmeton Gazeta Express.

Megjithatë, SHBA-ja do të marrë frenat e tre komandave pak më poshtë në hierarki, por që mbajnë përgjegjësi të konsiderueshme për operacionet - Komanda Ajrore Aleate, Komanda Detare Aleate dhe Komanda Tokësore Aleate, tha burimi ushtarak dhe një person tjetër i njohur me çështjen.

I pyetur në lidhje me ndryshimet e planifikuara, një zyrtar i NATO-s tha: "Aleatët kanë rënë dakord për një shpërndarje të re të përgjegjësisë së oficerëve të lartë në të gjithë Strukturën e Komandës së NATO-s, në të cilën aleatët europianë, përfshirë anëtarët më të rinj të NATO-s, do të luajnë një rol më të spikatur në udhëheqjen ushtarake të Aleancës”.

Zyrtari tha se vendimi lidhej me "planifikimin për rotacionet e ardhshme" dhe më shumë detaje do të jepen në kohën e duhur.

Ndryshimet e komandës u raportuan më parë nga gazeta franceze La Lettre dhe nga Politico.