Kryeministri shqiptar Edi Rama tha se qeveria e tij do ta ndryshojë ligjin për t'i mbrojtur ministrat nga shkarkimi ndërsa janë nën hetim penal, duke nxitur opozitën ta akuzojë atë se po përpiqet të mbrojë veten dhe po dëmton pavarësinë e gjyqësorit, shkruan Reuters.

Një gjykatë pezulloi zëvendësen e Ramës, Belinda Balluku, në nëntor pas ngritjes së aktakuzës ndaj saj nga prokurorët antikorrupsion të Shqipërisë, të njohur si SPAK, për ndërhyrje të dyshuar në një tender për projekte infrastrukturore, gjë që ajo e mohon.

Çështja ka nxitur një mosmarrëveshje mes SPAK-ut, i cili i ka kërkuar parlamentit t’ia heqë imunitetin Ballukut për të lejuar arrestimin e saj, dhe Ramës, i cili është ankuar për tejkalim të kompetencave nga ana e gjyqësorit, veçanërisht në lidhje me paraburgimet.

Shqipëria synon të anëtarësohet në Bashkimin Europian deri në vitin 2030, por blloku thotë se vendi duhet të bëjë më shumë për të luftuar krimin dhe korrupsionin.

Partia Socialiste e Ramës, e cila vitin e kaluar siguroi një mandat të katërt radhazi, ka një shumicë të rehatshme parlamentare dhe është e paqartë nëse dhe kur kuvendi do t’i heqë imunitetin Ballukut, e cila ka shërbyer gjithashtu si ministre e infrastrukturës dhe është një aleate e afërt e kryeministrit.

“Në momentin që një ministër shkarkohet, jo vetëm që shkarkohet një person, por e gjithë puna e atij institucioni”, u tha Rama ligjvënësve të partisë së tij të hënën, duke njoftuar planin për ndryshimin e ligjit.

Opozita ka organizuar një seri protestash muajt e fundit në kryeqytetin Tiranë për të kërkuar dorëheqjen e Ballukut. Të hënën ata thanë se Rama po kërkonte t'i kontrollonte proceset gjyqësore në favor të tij me këto ndryshime.

“Kjo nuk është asgjë më shumë se një përpjekje e Ramës për ta mbrojtur veten, duke hedhur në erë si pavarësinë e gjyqësorit ashtu edhe ndarjen e pushteteve... sepse pas Ballukut dhe shkeljeve të saj qëndron Rama”, tha Partia Demokratike, partia kryesore opozitare, në një deklaratë për Reuters.