Rinumërimi i të gjitha votave nga zgjedhjet e 28 dhjetorit, po vazhdon të shpërfaq mospërputhje të mëdha të rezultateve të kandidatëve në vota nga ato që u dhanë paraprakisht. Pikërisht dallimet që u gjetën nga rinumërimi i vetëm i disa vendvotimeve çoi në rinumërim të plotë, dhe krijoi debat të gjerë në vend duke u kërkuar edhe hetim nga ana e Prokurorisë, shkruan Gazeta Express.

Deri më tani, komuna që është ‘kampion’ i mospërputhjes së votave të kandidatëve është Prizreni.  Atje, rinumërimi 100% i të gjitha votave, ka rezultuar që disa kandidatëve tu hiqen, jo vetëm qindra, por edhe mijëra vota.

Nga Lëvizja Vetëvendosje, kandidatëve si Arbër Rexhaj, i janë hequr 631 vota. Pas tij, vijnë Rea Krasniqi me 553 vota më pak, Dafina Ismaili me 459 vota më pak, dhe Valon Ramadani me 422 vota më pak.

Nga partitë e tjera, si Partia Demokratike e Kosovës, dhe Lidhja Demokratike e Kosovës, rinumërimi ka shfaqur mospërputhje më të mëdha votash.  Nga PDK, Fetah Paçarizi i janë hequr më shumë se 6 mijë vota, Nait Hasanit më shumë se 3 mijë e 400  vota e Kujtim Gashit më shumë se 2 mijë e 300 vota.  Edhe tek LDK ka mospërputhje të mëdha. Atje, Xhavit Ukës më shumë se 1 mijë e 500 vota. Driton Selmanajt 1 mijë vota, dhe Anton Quni 514 vota.

Një situatë e ngjashme me mospërputhje të mëdha votash, duket se do të jetë edhe në Podujevë.

Atje, edhe pse janë rinumëruar vetëm  10%, e të gjitha votave, disa kandidatëve të VV’së, tashmë u janë hequr qindra vota. Kështu, Ejup Maqedoncit, i janë larguar 288 vota, Vendenis Lahut 246 vota, dhe Adelina Stublla 174 vota.

Ndërkaq tek partitë e tjera, mospërputhjet e votave mes kandidatëve janë shumë herë më të vogla tek kjo komunë.

Një situatë e ngjashme me kandidatët e VV’së është edhe në Dragash. Për dallim nga partitë e tjera, atje ku tashmë ka përfunduar rinumërimi i plotë, një kandidati të VV’së, u janë hequr qindra vota. Më saktësisht,  Filiz Mustafa tash ka 231 vota më pak. /GazetaExpress