Olympique de Marseille po hyn në një nga javët më të vështira të sezonit, me dy përballje radhazi kundër Real Madridit në UEFA Champions League dhe PSG-së në Ligue 1.

Para ndeshjes në “Santiago Bernabéu”, trajneri Roberto De Zerbi jo vetëm që analizoi ndeshjen e ardhshme, por gjeti kohë edhe për të lavdëruar Xabi Alonson, trajnerin e ri të Madridit.

Trajneri italian shfaqi admirim të madh për kundërshtarin e tij, duke theksuar përvojën futbollistike dhe vizionin e tij për të ardhmen.

“Xabi është një trajner i shkëlqyer. Jam i bindur se do të arrijë sukses të madh te Real Madridi. Është një klub që e njeh shumë mirë, ka ide të qarta, ka mësuar nga disa prej trajnerëve më të mirë gjatë karrierës së tij, dhe tani po udhëheq lojtarë të rinj me potencial të madh. Do të arrijë rezultate të forta,” tha De Zerbi në konferencën për shtyp.

Italiani pranoi se ndalimi i Kylian Mbappé dhe sulmit të yjeve të Madridit është sfida më e madhe:

“Duhet të jemi shumë të kujdesshëm me Mbappén dhe lojtarët e tjerë, duke e ditur se rreziku për të pësuar gola në Bernabéu është gjithmonë i madh. Prandaj, nuk mund të lejojmë të humbim zotërimin e topit dhe duhet të kemi guxim në sulm. Kemi cilësi dhe krenari për të luftuar për një rezultat pozitiv,” shpjegoi ai.

De Zerbi theksoi gjithashtu se edhe pse do të kishte preferuar ta zhvillonte ndeshjen në “Stade Vélodrome”, skuadra e tij po e përballon sfidën me respekt dhe vendosmëri:

“Është një privilegj të jemi këtu. Duhet të luajmë me seriozitet për të marrë një rezultat pozitiv. Jemi një klub me histori të madhe dhe kemi fituar të drejtën për të qenë në këtë garë,” shtoi ai.

Trajneri vuri në pah edhe rëndësinë e lojtarëve me përvojë si Pierre-Emerick Aubameyang, Benjamin Pavard, Emerson dhe Mason Greenwood, të cilët sjellin stabilitet në ndeshje me presion të madh. Ai gjithashtu theksoi rolin e afrimeve të vona në merkato, të cilët ende po përshtaten, por mund të kenë ndikim të rëndësishëm.

Duke parë përpara, De Zerbi nënvizoi se Marseille duhet të ecë hap pas hapi, por gjithmonë me ambicie: fillimisht sfida në "Bernabéu" kundër Real Madridit dhe më pas përplasja e zjarrtë e “Le Classique” kundër PSG-së në Ligue 1./GazetaExpress/