Babai i mesfushorit të Manchester City, Antonio Hernández, ka hedhur dritë mbi situatën kontraktuale të djalit të tij, duke konfirmuar se negociatat janë në proces, por pa dhënë garanci për rinovim.

I pranishëm në një ceremoni në Madrid, ai u tregua i rezervuar për të ardhmen e fituesit të “Topit të Artë”, duke lënë të kuptohet se asgjë nuk është vendosur ende. “Ai është shumë rehat aty ku është. Ka bisedime, por nuk mund të them asgjë. Historia ende nuk është shkruar,” deklaroi Hernández.

Kontrata aktuale e Rodrit me Manchester Cityn skadon në vitin 2027, ndërsa interesimi i Real Madrid vazhdon të përmendet në mediat spanjolle. Mesfushori spanjoll konsiderohet si një nga objektivat strategjikë të klubit madrilen për të ardhmen.

29-vjeçari po kalon një periudhë delikate në karrierë, pasi në shtator 2024 pësoi një dëmtim të rëndë në ligamentin e kryqëzuar, që e la jashtë fushave për afro një vit. Tani, fokusi i tij kryesor mbetet rikthimi në formën optimale përpara Kupës së Botës 2026.

E ardhmja e Rodrit pritet të jetë një nga temat më të nxehta të merkatos verore. /GazetaExpress