Rodrygo ka bërë tashmë të qarta ndjenjat e tij për Liverpool-in, në mes të raportimeve se klubi anglez po përgatit një ofertë befasuese për yllin e Real Madridit.
24-vjeçari ka pasur një rol kyç në sukseset e Real Madridit nën drejtimin e Carlo Ancelottit, duke fituar tri tituj të La Ligës dhe dy Liga të Kampionëve që nga transferimi i tij nga Santos për 39 milionë paund në vitin 2019.
Megjithatë, gjërat janë bërë më të vështira për brazilianin që prej emërimit të trajnerit të ri Xabi Alonso, i cili zëvendësoi Ancelottin përpara Kampionatit Botëror për Klube.
Rodrygo e nisi ndeshjen hapëse të këtij turneu kundër Al Hilal-it, ku regjistroi një asist në barazimin 1-1, por më pas luajti vetëm 27 minuta në të gjithë pjesën tjetër të turneut dhe nuk u aktivizua fare ndaj Juventusit, Pachucas apo në humbjen 4-0 ndaj PSG-së në gjysmëfinale.
Alonso ka preferuar Gonzalo Garcian në sulm, ndërsa emra si Brahim Diaz dhe Arda Güler kanë përfituar më shumë minuta loje.
Rodrygo nuk ka shënuar për Realin që nga shkurti dhe sipas Fichajes, klubi është “gati ta shesë” atë. Kjo përforcohet nga raportime të tjera që thonë se Alonso ka marrë mbështetje të plotë nga drejtuesit për të përjashtuar këdo nga skuadra, pavarësisht emrit apo kostos.
Arsenali dhe Chelsea janë përmendur si të interesuar për brazilianin, ndërsa UOL Esporte raporton se Real Madrid kërkon 100 milionë euro (rreth 86 milionë paund) për ta lejuar të largohet.
Ndërkohë, sipas gazetës AS, edhe Liverpool është futur në garë, duke monitoruar nga afër situatën e Rodrygos në Madrid. Kjo vjen në një kohë kur është përfolur se Luis Diaz mund të largohet nga Anfield, me Barcelonën dhe Bayern Munich të interesuara për kolumbianin.
“Me largimin e mundshëm të Luis Diaz, Liverpool ka shfaqur interes për brazilianin. Madridi ende nuk ka marrë ndonjë ofertë,” shkruan AS.
Rodrygo e ka përballur Liverpool-in disa herë në Evropë, duke fituar katër nga pesë ndeshjet kundër tyre, përfshirë finalen e Ligës së Kampionëve në vitin 2022 ku Reali fitoi 1-0 me golin e Vinicius Jr.
Ai ishte shumë pranë një transferimi te Liverpool në vitin 2017 për vetëm 2.5 milionë paund, përpara se të nënshkruante me Realin.
“Nuk e mbyllëm marrëveshjen sepse nuk doja. Doja të qëndroja te Santos, edhe pse oferta ishte shumë e mirë… më në fund, arrita të realizoja ëndrrën time për të luajtur për Santos,” tha Rodrygo në vitin 2024.
“Por është e vërtetë që isha shumë pranë kalimit te Liverpool-i në 2017.”
Pavarësisht se e refuzoi Liverpool-in atëherë, ai ka shprehur gjithmonë admirim për klubin dhe tifozët e tij. Para një ndeshjeje të Ligës së Kampionëve në Anfield në vitin 2023, ai kishte deklaruar:
“Do të jetë shumë e vështirë të luajmë atje, këtë e dimë. Të luash kundër Liverpool-it është gjithmonë sfidë, me apo pa tifozë, por në Anfield është edhe më shumë.”
Megjithatë, sipas AS, Arsenali duket se është favorit aktual për ta nënshkruar brazilianin. Raportohet se Rodrygo ka bërë të qartë se, nëse largohet, dëshiron të zgjedhë vetë destinacionin e tij – dhe Arsenali është zgjedhja e tij e preferuar./GazetaExpress/
