Skuadra e Romës ia ka dalë të kalojë fazën në grup të Ligës së Europës dhe duke e bërë një gjë të tillë, është “blinduar” si ekipi më i qëndrueshëm italian i 10 viteve të fundit.

Rezulton se në këtë dekadë, mes të gjitha skuadrave italiane të cilat kanë marrë pjesë në kompeticionet ndërkombëtare, vetëm Roma ka qenë gjithmonë e saktë. Ajo regjistron 10 kualifikime në 10 pjesëmarrje të tilla, të ndara mes Ligës së Kampioneve, Ligës së Europës dhe Ligës së Konferencës.

Me pak fjalë, verdhekuqtë kanë kaluar gjithmonë fazën e parë të turneut, duke qenë ekipi më i qëndrueshëm, ndërsa ekipe të tjera edhe me më shumë emër nuk ia kanë dalë shpesh ta bëjnë një gjë të tillë, siç ndodhi në edicionin aktual me Napolin.