AS Roma ka dorëzuar projektin për stadiumin e ri, që do të ndërtohet në lagjen Pietralata, në lindje të Romës. Sipas klubit, stadiumi do të përfshijë një Curva Sud monumentale, më të madhën në Europë, dhe arkitekturë ikonike të frymëzuar nga tradita romake, me linja bashkëkohore dhe lidhje të fortë me territorin lokal.

Klubi thekson se stadiumi i ri do të ofrojë hapësira moderne dhe multifunksionale, të dedikuara për përjetimin e AS Romës edhe përtej ditëve të ndeshjeve, si dhe iniciativa për përmirësimin e mobilitetit, shërbimeve, qëndrueshmërisë mjedisore dhe integrimit urban.

Dorëzimi i projektit përfundimtar përfaqëson një hap të rëndësishëm drejt nisjes së ndërtimit dhe konfirmon vendosmërinë e klubit për të ofruar një infrastrukturë moderne, të qëndrueshme dhe ekonomike, që mund të bëhet një burim krenarie për qytetin dhe tifozët.

AS Roma ka falënderuar kryetarin e Bashkisë, Roberto Gualtieri, autoritetet lokale dhe të gjithë aktorët e përfshirë për bashkëpunimin. Stadiumi i Pietralatës është gjithashtu në listën e impianteve potenciale që mund të presin Euro 2032 të UEFA-s.

“E ardhmja e shtëpisë sonë po afrohet gjithnjë e më shumë. Forza Roma,” përfundon deklarata e klubit.