Manchester United u ngjit në vendin e gjashtë në Premier League pas fitores minimale 1-0 ndaj Newcastle në “Boxing Day”, por Wayne Rooney ka shprehur shqetësime serioze për situatën e skuadrës së Ruben Amorim.

Legjenda e klubit vlerësoi faktin që United arriti të marrë tri pikët dhe u dha hapësirë lojtarëve të akademisë, por theksoi se paraqitja ishte e dobët dhe skuadra ka nevojë urgjente për përforcime në afatin kalimtar të janarit. Rooney u shpreh se me këtë thellësi në skuadër dhe me shumë mungesa, United rrezikon të rrëshqasë në renditje.

Nga ana tjetër, trajneri Ruben Amorim pranoi se ekipi po kalon një periudhë të vështirë, por insistoi se klubi ka një plan të qartë dhe nuk do të devijojë nga ai, edhe nëse kjo do të thotë të vuajnë për rezultate në afat të shkurtër.

Pavarësisht performancës jo bindëse, United arriti fitoren dhe vazhdon garën për zonën e top katërshes, por dilemat për përforcime mbeten të hapura. /GazetaExpress