Rusia është e gatshme t’i ofrojë Serbisë projektin për ndërtimin e një centrali bërthamor, është konfirmuar nga kompaninë ruse të energjisë Rosatom pas takimit të drejtorit të saj, Aleksej Lihaçov, me presidentin e Serbisë, Aleksandar Vuciq, në Beograd.

“Ne mund të ndërtojmë një central që është 99 deri në 100 për qind produkt rus, ose ta realizojmë në formatin e një konsorciumi ndërkombëtar, me pjesëmarrje maksimale të furnitorëve”, ka deklaruar Lihaçov para gazetarëve pas takimit.

Megjithatë, Serbia aktualisht nuk ka centrale bërthamore dhe ndërtimi i tyre është i ndaluar me ligj që nga viti 1989, pas katastrofës në Çernobil. Ndalimi ligjor mbetet ende në fuqi.

Sipas raportimeve, Serbia rreth 70 për qind të nevojave për energji elektrike i mbulon nga termocentralet me qymyr, të cilat konsiderohen ndotës të mëdhenj, ndërsa për furnizimin me gaz është plotësisht e varur nga Rusia.

Presidenti Vuçiq ka bërë të ditur në profilin e tij zyrtar në Instagram se me drejtuesin e Rosatom ka diskutuar për përdorimin e energjisë bërthamore në fushat e farmaceutikës, shëndetësisë dhe prodhimit të energjisë elektrike.

Mediat serbe kishin raportuar edhe më herët se gjatë një takimi me presidentin rus Vladimir Putin në Pekin, Vuçiq kishte ftuar kompanitë ruse të marrin pjesë në projekte infrastrukturore në Serbi. /Vijesti