Ministri rus i Financave, Anton Siluanov, ka propozuar legalizimin e kazinove online si një mjet për të rritur të ardhurat e buxhetit shtetëror, raportoi të martën gazeta e biznesit Kommersant, duke cituar dy burime të njohura me një letër që ministri i ka dërguar presidentit rus, Vladimir Putin.
Sipas raportimit, Siluanov ka sugjeruar heqjen e ndalimit të kazinove online në Rusi, të cilat janë të paligjshme që nga viti 2009.
Propozimi vjen në një kohë kur qeveria ruse po kërkon burime të reja financiare për të kompensuar kostot gjithnjë e më të larta të luftës kundër Ukrainës, raporton Times of Moscow.
Pavarësisht ndalimit zyrtar, lojërat e fatit online kanë njohur një rritje të ndjeshme në vitet e fundit. Ministria e Financave vlerëson se xhiroja totale e tregut të ligjshëm të basteve në Rusi, i cili lejon operatorët e licencuar të basteve dhe totalizatorët të operojnë online, arriti në 1.7 trilion rubla, ose rreth 22.2 miliardë dollarë, gjatë vitit 2024.
Në të njëjtën kohë, madhësia e tregut të lojërave të paligjshme online vlerësohet të jetë edhe më e madhe. Sipas të dhënave të cituara nga Kommersant, tregu i kazinove ilegale online arrin në rreth 3 trilion rubla, ose 39.1 miliardë dollarë, me afro 100 platforma të jashtëligjshme që vazhdojnë të operojnë në territorin rus.
Raporti thekson se propozimi i Siluanovit parashikon krijimin e një sistemi të unifikuar për ndjekjen dhe monitorimin e basteve, të ngjashëm me mekanizmin që përdoret aktualisht për bastoret e ligjshme. Sipas këtij modeli, e gjithë industria e kazinove online do të vendosej nën mbikëqyrjen e një rregullatori të vetëm shtetëror, i cili do të kishte përgjegjësi të posaçme për parandalimin e varësisë nga lojërat e fatit dhe mbrojtjen e përdoruesve.
Njëkohësisht, agjencitë e tjera qeveritare do të ngarkoheshin me intensifikimin e përpjekjeve për të bllokuar dhe mbyllur operatorët e paligjshëm që veprojnë jashtë kornizës ligjore.
Në letrën drejtuar presidentit Putin, Siluanov ka vlerësuar se legalizimi i kazinove online, i shoqëruar me vendosjen e një takse mujore prej të paktën 30 për qind mbi të ardhurat bruto të operatorëve, mund të gjenerojë rreth 100 miliardë rubla, ose afërsisht 1.3 miliardë dollarë në vit, për buxhetin federal të Rusisë.
Megjithatë, raporti i Kommersant nuk specifikon nëse presidenti Vladimir Putin ka reaguar ndaj këtij propozimi apo nëse ka shprehur mbështetje për legalizimin e kazinove online.
Industria e lojërave online ka shënuar një rritje të jashtëzakonshme në nivel global gjatë viteve të fundit.
Paralelisht, një numër gjithnjë e më i madh studiuesish dhe ekspertësh të shëndetit publik kanë ngritur alarmin për rritjen e varësisë nga lojërat e fatit, duke e konsideruar atë një problem serioz shëndetësor dhe social, veçanërisht në kushtet e zgjerimit të pakontrolluar të platformave digjitale.
The Geo Post
