Numri 5 i botës, Elena Rybakina, mposhti kryesuesen e turneut Aryna Sabalenka me goditje jashtëzakonisht të fuqishme për të fituar titullin e saj të parë në “Australian Open”, pas një finaleje emocionuese me tri sete të shtunën.
Nën çatinë e mbyllur të “Rod Laver Arena”, Rybakina nga Kazakistani triumfoi ndaj Sabalenkës nga Bjellorusia me rezultatin 6-4, 4-6, 6-4, pas dy orësh e 18 minutash lojë.
Rybakina e vulosi titullin e saj të dytë “Grand Slam” me një “ace” dhe e festoi në mënyrë të përmbajtur, me një shtrëngim grushti.
Ajo befasoi Sabalenkën favorite falë fuqisë së madhe në goditje, shërbimit të fortë dhe qëndrueshmërisë, edhe pse ishte në disavantazh 0-3 në setin vendimtar.
Kampionia e “Wimbledonit 2022” mori revanshin pas finales së vitit 2023, kur Sabalenka kishte fituar pas një përmbysjeje dramatike.
Për Sabalenkën, kjo ishte një zhgënjim i madh, pasi ajo kishte fituar 26 nga 27 ndeshjet e fundit në “Melbourne Park” përpara kësaj finaleje.
27-vjeçarja kishte humbur vetëm një herë në katër vitet e fundit në “Australian Open”, në finalen e vitit të kaluar ndaj Madison Keys, duke i dhënë fund përpjekjes për një titull të tretë radhazi.
Vetëm Evonne Goolagong Cawley dhe Martina Hingis kishin arritur më parë të luanin të paktën katër finale radhazi në Australian Open në epokën profesionale.
Finalja pritej me shumë interes, pasi të dyja lojtaret kishin arritur deri aty pa humbur asnjë set.
Sabalenka dha sinjalin e parë me një “forehand” të fuqishëm, por Rybakina reagoi me qetësi, theu shërbimin në lojën hapëse dhe kaloi në epërsi 4-2.
Rybakina nuk u mbështet vetëm te forca, por tregoi edhe finesë me “drop-shote” të sakta, duke e nxjerrë Sabalenkën nga ritmi. Ajo e mbylli setin e parë në 37 minuta.
Në setin e dytë, Sabalenka rriti presionin dhe ndryshoi rrjedhën e lojës falë atletizmit të shkëlqyer.
Në setin vendimtar, bjellorusja kaloi në epërsi 3-0, por Rybakina reagoi fuqishëm, duke fituar pesë lojë radhazi dhe duke përmbysur ndeshjen.
Sabalenka e detyroi Rybakinën ta mbyllte ndeshjen në shërbim, por kazakja tregoi qetësi dhe e siguroi fitoren me stil, duke shkruar historinë e saj në “Australian Open”./GazetaExpress/
