Një krahasim i fundit i kostos së jetesës në Evropë tregon kontraste të mëdha sa i përket çmimeve të restoranteve, me Kosovën që renditet ndër vendet më të përballueshme, ndërsa Zvicra dhe Danimarka vazhdojnë të konsiderohen ndër destinacionet më të shtrenjta për një drekë apo darkë, transmeton albinfo.ch.

Referuar të dhënave të platformave të kostos së jetesës, një darkë tre-kursesh për dy persona në një restorant mesatar në Kosovë mund të kushtojë rreth 20 euro, shumë më pak se mesatarja evropiane.

Në anën tjetër të listës qëndron Zvicra, ku një vakt i ngjashëm zakonisht kalon mbi 100 franga zvicerane, duke reflektuar standardin e lartë të jetesës dhe kostot e shërbimeve në vend.

Edhe Danimarka paraqitet me çmime të larta. Një darkë tre-kursesh për dy persona në një restorant të kategorisë mesatare kushton zakonisht rreth 700–750 korona daneze (afërsisht 95–105 euro), sipas analizës së portalit të udhëtimeve Ferrygogo.

Në disa raste, çmimi mund të arrijë edhe 800–1,200 korona, duke e bërë ngrënien jashtë një shpenzim që shpesh konsiderohet luks.

Për krahasim, një vakt i thjeshtë për një person në Danimarkë kushton rreth 150 korona (rreth 20 euro), çka tregon nivelin e përgjithshëm të lartë të çmimeve në sektorin e gastronomisë.

Ekspertët e lidhin këtë diferencë me pagat më të larta, koston e fuqisë punëtore dhe qiratë e shtrenjta për bizneset, faktorë që ndikojnë drejtpërdrejt në faturën që paguajnë klientët.

Kontrasti mes vendeve evropiane mbetet i dukshëm: ndërsa në Kosovë ngrënia jashtë mund të jetë pjesë e përditshmërisë, në shtetet nordike apo në Zvicër ajo shpesh rezervohet për raste të veçanta.