Ylli i Liverpoolit, Mohamed Salah, pritet të përfundojë pushimet dhe të rikthehet më herët në Angli pas vdekjes tragjike të shokut të skuadrës, Diogo Jota, sipas një raportimi.

Bota e futbollit është në zi pas lajmit të së enjtes, kur Jota dhe vëllai i tij humbën jetën në një aksident automobilistik. Makina e tyre Lamborghini pësoi shpërthim të gomës gjatë një parakalimi në autostradën A-52 në Cernadilla, pranë Zamorës, vetëm 10 milje nga kufiri me Portugalinë.

Mjeti raportohet se është përmbysur dhe më pas ka shpërthyer në flakë. Ekipet e shpëtimit nuk arritën t’i shpëtonin. Vëllai i Jotës, André Silva (26), ishte futbollist i klubit Penafiel në kategorinë e dytë portugeze.

Liverpool pritet të nisë përgatitjet për sezonin e ri të martën, ndërsa Jota ishte nisur me makinë drejt Mbretërisë së Bashkuar pas martesës me partneren e tij, Rute, më 22 qershor në Porto.

Sipas Yallakora në Egjipt, Salah do të kthehet në Angli të premten, pas lajmit të hidhur.

Sipas Turkiye Today, ai ka qenë me pushime në Bodrum (Turqi), ndërsa është parë gjithashtu në Mombasa (Kenia) dhe Mykonos (Greqi). Ai ka ndarë disa foto nga pushimet në rrjetet sociale.