Sot, senatorët amerikanë, demokratja Jeanne Shaheen, anëtare e Komitetit të Senatit për Marrëdhënie me Jashtë, dhe republikani Thom Tillis, bashkëkryetarë të Grupit të Vëzhguesve të NATO-s në Senat kanë nxjerrë një reagim të përbashkët lidhur me deklarimet e presidentit amerikan, Donald Trump, për tërheqjen e SHBA’së nga NATO.
Në reagim thuhet se NATO është Aleanca ushtarake më e fortë dhe më e suksesshme në histori dhe si e tillë promovon stabilitetin ekonomik dhe mbron raportet e rëndësishme tregtare të SHBA-së.
"NATO është aleanca ushtarake më e fortë dhe më e suksesshme në histori. Ajo promovon stabilitetin ekonomik dhe mbron marrëdhëniet tona më të rëndësishme tregtare. Është një shumëzues i rëndësishëm i forcës në një botë gjithnjë e më të rrezikshme. Aleatët tanë, vit pas viti, janë përpjekur me vendosmëri të përballen me kërcënimet në rritje dhe kanë rënë dakord të shpenzojnë pesë përqind të PBB-së për mbrojtje për të forcuar ndarjen e barrës. Qytetarët tanë e dinë se NATO i bën amerikanët më të sigurt dhe më të begatë, prandaj favorizimi i NATO-s është vazhdimisht mbi 60 përqind në mesin e publikut amerikan”, thuhet në reagim.
Senatorët tutje thonë se NATO qëndroi pranë Amerikës dhe i erdhi në ndihmë SHBA-së pas sulmeve të 11 shtatorit.
“Ushtarët e tyre luftuan dhe vdiqën përkrah trupave tona në Afganistan”, thuhet në reagim.
Sipas senatorëve, çdo President që mendon të përpiqet të tërhiqet nga NATO jo vetëm që po përmbush ëndrrat më të mëdha të Vladimir Putin dhe Xi Jinping, por do të minonte edhe interesat e sigurisë kombëtare të vetë Amerikës.
“Le të jemi të qartë, Kongresi nuk do të lejojë që Shtetet e Bashkuara të tërhiqen nga NATO. Një projektligj dypartiak i hartuar nga senatori i atëhershëm Rubio, i cili u miratua në ligj, pengon çdo President ta bëjë këtë në mënyrë të njëanshme. Në vend të kësaj, ligji thotë qartë se vetëm Kongresi mund ta autorizojë Presidentin të tërheqë SHBA-në nga NATO. Kjo nuk do të ndodhë. Kongresi dhe populli amerikan e dinë se jemi më të fortë kur qëndrojmë me aleatët tanë. Ky është një fakt themelor dhe një fakt që ne e injorojmë vetëm në dëmin tonë.”, përfundon reagimi.
“Let us be clear, Congress will never allow the President to unilaterally withdraw from NATO.” -@SenatorShaheen and @SenThomTillis
🔗 Full statement: https://t.co/FqqJpJGj76 pic.twitter.com/yNZHhOUFFc
