Serbia ka regjistruar rezultatin më të dobët në dy dekadat e fundit në Indeksin e Perceptimit të Korrupsionit (CPI), duke u renditur në vendin e 116-të në nivel global, ka njoftuar organizata ndërkombëtare Transparency International.

Sipas raportit vjetor më të fundit, Serbia ka marrë 33 pikë nga maksimumi 100, që përfaqëson një rënie prej dy pikësh krahasuar me vitin e kaluar. Ky është vlerësimi më i ulët që Serbia ka shënuar që nga viti 2004.

Indeksi i Perceptimit të Korrupsionit mat perceptimin e nivelit të korrupsionit në sektorin publik, ku një numër më i ulët pikësh tregon një shkallë më të lartë korrupsioni. Rezultati i Serbisë është nëntë pikë nën mesataren globale dhe plot 29 pikë më i ulët se mesatarja e vendeve të Bashkimit Evropian.

Veçanërisht domethënëse është se Serbia, për herë të parë, renditet pas Bosnje dhe Hercegovinës, e cila është vlerësuar me 34 pikë. Në kontekstin evropian, rezultate më të dobëta se Serbia kanë vetëm Bjellorusia dhe Turqia me nga 31 pikë, si dhe Rusia me 22 pikë, duke e vendosur Serbinë ndër vendet më dobët të vlerësuara në Evropë dhe në rajon.

Në krye të listës globale renditen Danimarka me 89 pikë dhe Finlanda me 88 pikë, ndërsa në fund të renditjes ndodhen Somalia dhe Sudani i Jugut, të dyja me nga nëntë pikë.

Transparency International në raport paralajmëron se korrupsioni dhe kriza klimatike janë dy probleme globale të lidhura ngushtë mes vete. Sipas organizatës, fonde të mëdha financiare të destinuara për luftën kundër ndryshimeve klimatike shpesh vidhen ose keqpërdoren, duke e bërë edhe më të vështirë përballjen me një nga sfidat më të mëdha të botës moderne.