Sergio Ramos, ish-kapiteni legjendar i Real Madridit, është shfaqur në qendër të vëmendjes jo për një rikthim në fushë, por për një lëvizje të madhe jashtë saj. Pas përfundimit të aventurës së tij me Monterrey në Meksikë, Ramos po udhëheq një ofertë monumentale prej 400 milionë eurosh për blerjen e Sevillas.

Sipas The Athletic, Ramos është fytyra publike e një grupi investitorësh të huaj – mes tyre edhe një fond amerikan – që synojnë të blejnë 100% të aksioneve të klubit andaluzian. Edhe pse nuk do të jetë aksioneri kryesor, roli i Ramosit konsiderohet kyç në këtë operacion.

Oferta vlerëson Sevillan në rreth 400 milionë euro, por marrëveshja përfundimtare mbetet e kushtëzuar nga përcaktimi i saktë i borxhit të klubit. Aktualisht, borxhi vlerësohet rreth 180 milionë euro, megjithatë ekziston një debat nëse huaja nga CVC Capital Partners duhet të përfshihet në këtë total.

Nëse ky projekt realizohet, ai mund të shënojë fundin e karrierës së Ramosit në futbollin spanjoll. Rregullat e La Ligës ndalojnë që një lojtar të aktivizohet në kampionat nëse zotëron aksione në një klub, çka do ta bënte Ramosin të papërshtatshëm për të luajtur për Sevillan apo çdo ekip tjetër në Spanjë.

Ky zhvillim vjen në një moment kritik për Sevillan, e cila po përballet me vështirësi serioze financiare. Klubi raportoi humbje prej 81.8 milionë eurosh në sezonin 2023/24 dhe në mars të vitit 2024 u detyrua të merrte një hua prej 108 milionë eurosh, të organizuar nga Goldman Sachs.

Një rikthim i Ramosit në Sevilla, qoftë edhe nga zyra drejtuese, mund të shënojë një kapitull të ri për klubin që po kërkon stabilitet dhe ringritje. /GazetaExpress