Komiteti Ekzekutiv i UEFA-s do të marrë vendim të enjten nëse do t’i lejojë Serie A të zhvendosë ndeshjen AC Milan – Como në Australi në shkurt 2026.

Lega Serie A bëri kërkesën zyrtare për të luajtur këtë takim jashtë vendit, pasi stadiumi San Siro nuk do të jetë në përdorim në fillim të shkurtit për shkak të ceremonisë hapëse të Lojërave Milano-Cortina 2026.

Ndërkohë që Interi ka angazhime në Ligën e Kampionëve, Milan dhe Como nuk kanë, gjë që i lejon të bëjnë një udhëtim më të gjatë për këtë ndeshje. Kjo i nxiti ata të kërkojnë që kjo të bëhet ndeshja e parë e Serie A që luhet jashtë Italisë, konkretisht në Perth.

Miratimi i disa institucioneve është i nevojshëm

Për të realizuar këtë plan, kërkohet miratimi i disa organizatave, përfshirë Federatën Australiane të Futbollit, FIFA-n, Konfederatën Aziatike të Futbollit dhe UEFA-n. Nga të gjitha, UEFA-ja shihet si autoriteti më skeptik, kështu që mbledhja e nesërme e komitetit ekzekutiv në Tiranë mund të jetë vendimtare.

Serie A, AC Milan dhe Como argumentojnë se kjo është një mundësi për të rritur shikueshmërinë e ligës, dhe se bëhet fjalë për një rast të veçantë, jo për një praktikë të përhershme.

Situata po ndiqet me kujdes edhe nga ligat e tjera evropiane, pasi Premier League dhe LaLiga do të kërkonin gjithashtu të zhvillonin ndeshje jashtë vendit nëse do të merrnin lejen përkatëse.

Ndërkohë, një ndeshje e LaLiga-s, Villarreal – Barcelona, është propozuar të luhet në Miami në dhjetor 2025. /GazetaExpress/