Kombëtarja e Kosovës në konkurrencën e vajzave ka zhvilluar sot stërvitje në Kampin Nacional në Hajvali para udhëtimit në Talin, ku do t’i zhvillojë dy ndeshje miqësore kundër Estonisë, më 28 qershor dhe më 1 korrik.

Këto ndeshje do të shërbejnë si fazë testuese para përballjeve të "play off"-it të Ligës së Kombeve, ku Dardanet për kundërshtar do ta kenë Turqinë.

Përzgjedhësi i Kombëtares, Sami Sermaxhaj, ka theksuar se datat e ndeshjeve nuk janë të përshtatshme për Kosovën, për shkak të përfundimit të kampionatit, por thekson se respektohen datat e UEFA-s dhe se ky grumbullim është i vlefshëm për të testuar lojtaret e reja.

“Këto data nuk janë të përshtatshme, pasi tek ne ka përfunduar kampionati po thuajse që dy muaj dhe lojtaret nuk vijnë në formën më të mirë, por këto janë data të UEFA-s dhe ne i respektojmë. Estonia dhe shtetet skandinave janë në kampionat e sipër dhe ndoshta në formën më të mirë, mirëpo janë dy ndeshje testuese dhe ideja kryesore është t’i testojmë disa lojtare të reja që nuk kemi pasur mundësi t’i provojmë në ndeshjet zyrtare dhe të shohim se cila prej tyre mund të na shërbejë për ndeshjet e ‘play-off’-it në muajin tetor. Katër lojtare për shkaqe shëndetësore nuk kanë mundur të bashkohen, disa të tjera për shkak të obligimeve shkollore dhe disa për shkak të obligimeve të punës, mirëpo ne kemi zgjedhur lojtaret që mendojmë se janë potencial dhe perspektivë për të ardhmen. 60-70 përqind e formacionit bazë nuk është në këtë grumbullim, por ne do të shkojmë atje që ta përfaqësojmë vendin në mënyrën më të mirë të mundshme me këto lojtare që i kemi në dispozicion. Estonia është një ekip me mentalitet shumë bashkëveprues dhe funksionojnë si grup. Nuk ësht ekip i ngjashëm me Turqinë, por ideja jonë është të nxjerrim individët që do të na shërbejnë me Turqinë, pasi ndaj këtij kundërshtari në tetor duhet t’i qasemi lojs edhe me sistem tjetër, por edhe me forca tjera”, tha Sermaxhaj.

Sulmuesja Kaltrina Biqkaj e vlerësoi grumbullimin si një mundësi të mirë për të testuar ekipin dhe për të përgatitur sfidat që e presin në vjeshtë.

“Ka shumë lojtare të reja për këto dy miqësore, pasi trajneri kryesisht ka marrë lojtare për t’i testuar, por jemi edhe disa lojtare nga ekipi bazë. Janë dy ndeshje testuese, të cilat besoj se do të na shërbejnë shumë mirë, sidomos për ta parë gjendjen e ekipit, por edhe si paralojë për ndeshjet e ‘play-off’-it kundër Turqisë. Edhe në të kaluarën kemi luajtur miqësore me Estoninë dhe kryesisht kemi korrur fitore, por kësaj radhe e kemi një miks të ekipit, andaj shpresoj të komponohemi dhe të kemi rezultat të mirë”, tha ajo.

Ndërkohë, futbollistja e re Krenare Kelmendi, e cila është ftuar për herë të parë në Kombëtaren A, shprehet e emocionuar për mundësinë dhe vlerësimin që ka marrë, ndonëse nuk do të udhëtojë në Estoni për shkak të angazhimeve shkollore.

“Është hera e parë që jam pjesë e Kombëtares A dhe po ndihem shumë mirë dhe e vlerësuar duke pasur parasysh moshën time. Dje e kishim ndeshjen testuese mes dy ekipeve të Kombëtares U17, aty nuk kam qenë ndoshta në maksimumin tim, por paraqitja ime i ka rënë në sy edhe trajnerit dhe për këtë arsye edhe më ka ftuar. Kësaj radhe për shkak të obligimeve shkollore nuk do të mund të udhëtoj me kombëtaren në Estoni, por shpresoj se në të ardhmen sërish do të jem e ftuar”, tha ajo.

Ekspedita e Dardaneve udhëton nesër drejt Talinit, ku atje do t’i bashkohen edhe disa prej futbollisteve që luajnë jashtë vendit, derisa para ndeshjes që zhvillohet të shtunën, do të kryejë edhe një seancë stërvitore.