Shtetet nikoqire të Kupës së Botës 2026 janë të vendosura që Irani të marrë pjesë në turneun e kësaj vere, pavarësisht frikës së bojkotit.

Raporte gjatë fundjavës treguan se kombëtarja iraniane mund të tërhiqej nga pjesëmarrja pas përshkallëzimit të dhunës me SHBA-në.

Sulme ajrore ranë mbi qytete në të gjithë vendin pas një operacioni të përbashkët ushtarak midis SHBA dhe Izraelit të shtunën dhe të dielën.

Iran reagoi ndërsa kaosi përhapej në Lindjen e Mesme vetëm disa muaj para Kupës së Botës.

Megjithatë, midis SHBA, Kanadasë dhe Meksikës ka shpresë që Irani të përmbushë detyrimet e tij dhe të marrë pjesë në këtë festival futbolli.

Drejtori ekzekutiv i Futbollit të SHBA-së, JT Batson, tha për “Sky News”: “Presidenti i FIFA-s, Gianni Infantino, gjatë fundjavës shprehu qëllimin për një Kupë Bote të sigurt dhe të qetë ku të gjitha skuadrat marrin pjesë. Dhe ne padyshim e mbështesim këtë”.

Ai shtoi: “Ne kemi luajtur me Iranin disa herë në Kupën e Botës dhe, sikurse çdo skuadër tjetër nga 47 të tjerat, qëllimi ynë do të ishte të fitonim. Dhe presim ta bëjmë pikërisht këtë”.

Presidenti i Federatës Iraniane të Futbollit, Mehdi Taj, nuk ishte aq i sigurt, duke thënë të shtunën: “Me atë që ndodhi sot dhe me atë sulm nga Shtetet e Bashkuara, është e pamundur të shohim me optimizëm Kupën.” Ai shtoi: “Por ata që drejtojnë sportin janë ata që duhet të vendosin për këtë”.

Infantino, i cili i dha Donald Trumpit “Çmimin e Paqes FIFA” gjatë shortit të fazës së grupeve të Kupës së Botës në dhjetor, tha: “Shpresoj shumë që kjo të jetë një moment paqeje, shpresoj të kontribuojmë për të bashkuar pak botën. Mendoj se bota ka shumë nevojë për këtë”.

Irani është në një grup me Belgjikën, Egjiptin dhe Zelandën e Re.

Ata do të luajnë në Los Angeles dhe Seattle, me mundësinë të përballen me SHBA-në në rundin e 32 më të mirëve nëse të dyja skuadrat përfundojnë të dyta.

Ndeshja do të zhvillohej më 3 qershor në Dallas, nëse SHBA, nën drejtimin e Mauricio Pochettino, përfundon e dyta në grupin e saj me Paraguajin, Australinë dhe një kualifikuese që mbetet për t’u konfirmuar – që aty mund të jetë edhe kombëtarja e Kosovës, nëse e fiton “play-offin” në mars.

Ka gjithashtu pasiguri mbi ardhjen e tifozëve iranianë në SHBA për të ndjekur ndeshjet për shkak të ndalimit të udhëtimit të vendosur nga Trump.

Sekretari i përgjithshëm i FIFA-s, Mattias Grafstrom, shpjegoi: “Lexova lajmet po ashtu si ju këtë mëngjes. Ne patëm një takim dhe është pak e parakohshme të komentojmë në detaje. Por, sigurisht, do të monitorojmë zhvillimet”.

Ai vijoi: “Patëm shortin e finales në Washington DC ku morën pjesë të gjitha skuadrat. Sigurisht, fokusi ynë është të kemi një Kupë Bote të sigurt ku të gjithë marrin pjesë. Do të vazhdojmë të komunikojmë me tre qeveritë nikoqire – Meksikë, Kanada dhe SHBA – përpara”./GazetaExpress/