Shefja e BE-së, Nataliya Apostolova, është duke qëndruar në selinë e LDK-së.

Kjo vizitë vjen pas vizitës së djeshme që ia bënë kësaj partie ambasadori amerikan Kosnett dhe ai britanik Abbott.

Dy partitë, LDK-ja dhe VV-ja kanë pasur thirrje të vazhdueshme nga ndërkombëtarët që të përmbyllin marrëveshjen dhe të krijojnë qeverinë e re.

Po ashtu, kryeministri në detyrë Ramush Haradinaj ka pritur sot në takim shefen e zyrës së BE-së në Kosovë, Nataliya Apostolova.

Haradinaj përmes një shkrimi në rrjetin social Facebook, tha se me Apostolovën biseduan për zhvillimet e fundit politike në vend si dhe vazhdimin e partneritetit mes Kosovës dhe BE-së.

“Theksova se institucionet e vendit janë të përkushtuara për të vazhduar obligimet kontraktuale sipas MSA-së, në të gjitha etapat tona të funksionimit dhe se Kosova ka përfunduar të gjitha kriteret për liberalizimin e vizave, fakt ky që i mbetet BE-së të vendosë në të drejtën tonë për lëvizjen e lirë të qytetarëve tanë”, ka shkruar Haradinaj.