Kampioni i Maqedonisë së Veriut, Shkëndija e Tetovës, do të zhvillojë sonte një nga ndeshjet më të rëndësishme të sezonit, përballë gjigantit rumun FCSB (ish-Steaua Bukuresht), në kuadër të ndeshjes së kthimit të raundit të dytë kualifikues për UEFA Champions League.

Tetovarët, të drejtuar nga trajneri Jeton Bekjiri, udhëtuan drejt Rumanisë me një avantazh minimal 1-0, falë fitores në ndeshjen e parë të zhvilluar në stadiumin e Çairit në Shkup.

Por sfida e kthimit në Arena Kombëtare të Bukureshtit, përballë një skuadre me përvojë evropiane si FCSB, pritet të jetë një betejë e vërtetë.

Formacionet zyrtare të publikuara: të dy trajnerët me skemë identike 4-2-3-1

FCSB (4-2-3-1):

Portier: Târnovanu

Mbrojtje: Crețu, Ngezena, Popescu, Radunović

Mesfushë mbrojtëse: Chiricheș, Șut

Mesfushë ofensive: Misculescu, A. Popescu, Cisotti

Sulmues: Birligea

Shkëndija (4-2-3-1):

Portier: Gaye

Mbrojtje: Trumçi, Fetai, Cake, Webster

Mesfushë mbrojtëse: Alhassan, Ramadani

Mesfushë ofensive: Latifi, Krasniqi, Tamba

Sulmues: Besart Ibraimi

Atmosferë e zjarrtë në Bukuresht nga "Ballistët"

Pak orë para ndeshjes, tifozët e flaktë të Shkëndijës, Ballistët, ndezën atmosferën në rrugët e Bukureshtit me këngë patriotike dhe kore që jehonin thirrjen: "Kur të bëhemi një shtet". Prania e tyre në kryeqytetin rumun jo vetëm që jep një shtysë morale për ekipin, por edhe tregon përkrahjen e fuqishme të shqiptarëve nga të gjitha trevat.

Çfarë e pret Shkëndijën në rast kualifikimi apo eliminimi

Nëse Shkëndija arrin të kualifikohet në raundin e tretë, ajo do të përballet me fituesin e çiftit Shelbourne (Irlandë) – Qarabag (Azerbajxhan). Në të kundërt, në rast eliminimi, rrugëtimi evropian nuk përfundon – Shkëndija do të kalojë në raundin e tretë të UEFA Europa League, ku do të përballet me kampionin e Kosovës, Drita e Gjilanit.

Objektivi: një Evropë më e madhe për futbollin shqiptar

Për Shkëndijën, kjo është më shumë se një ndeshje. Është një mundësi për të avancuar në Evropë, për të përfaqësuar denjësisht futbollin shqiptar në arenën ndërkombëtare dhe për të sjellë më shumë pikë koeficienti për klubet shqiptare në kompeticionet e UEFA-s - nga Maqedonia Veriore. /GazetaExpress/