Nga Mero Baze

I vetmi reciprocitet i arritur nga qeveria e Albin Kurtit në bisedime me Serbinë, është barazimi i policisë së Kosovës me protestuesit serb të barrikadave.

Pas “tregimit të muskujve” për Serbinë në mesin e fushatës elektorale, për të shmangur vëmendjen nga debati real elektoral në Kosovë, Albin Kurti i hyri një beteje të cilën shpresonte ta mbyllte pas zgjedhjeve, por e detyruan ta mbyllte për tri ditë.

Edhe pse Kosova ka plotësisht të drejtë të kërkojë respektimin e dinjitetit të shtetit të saj nga Serbia sa i takon qarkullimit të lirë të makinave në territorin serb, nxitimi për ta kthyer këtë objektiv shtetëror, në objektiv elektoral, solli një hap pas për Kosovën dhe një hap përpara vendosjes së dinjitetit të saj shtetëror.

Marrëveshja e Brukselit e bërë publike nga i dërguari i BE për Kosovën, ambasadori Lajçak, detyron palët të zhbllokojnë rrugët drejt pikës kufitare të Jarinës, duke larguar andej Policinë e Kosovës dhe të barrikaduarit serb  dhe duke vendosur KFOR në kufij, një akt që e kthen Kosovën pas në kohë.

I vetmi reciprocitet që ka mundur të vendosë Albin Kurti sot është reciprociteti mes Policisë së Kosovës dhe protestuesve serb pranë pikave kufitare që kishin ngritur barrikada.

Reciprociteti i stikave që mbulojnë targat është detyrim i marrëveshjes teknike për lirinë e lëvizjes që Kosova ka rënë dakord qysh më 2011 dhe që nuk është zbatuar.

Kurti po ashtu është tërhequr nga mos njohja e targave ilegale në Kosovë që i përkasin sistemit të vjetër, duke humbur dhe sovranitetin në mes të Prishtinës e jo më në veri të Kosovës.

Për të qenë të sinqertë, nuk është se kishte shumë mundësi të fitonte në këtë betejë e cila kishte më shumë objektiv elektoral se sa shtetëror. Pikërisht për këtë ai duhet të tregohej i matur, që për hir të partisë dhe zgjedhjeve, të mos dëmtonte shtetin. Në fakt ai e bëri pa ju dridhur dora, duke shpresuar se do ta mbante krizën pa u zgjidhur deri ditën e zgjidhjeve dhe pastaj të tërhiqej.

Përfundimi i krizës me heqjen e autoritetit shtetëror të Kosovës në raport me sigurinë në kufijtë e Kosovës, ku u vendos KFOR, dhe ngopja me një lugë të zbrazur që kanë pesë vjet që ia ofrojnë Kosovës, për t’u dukur sikur e ushqejnë, janë pasoja të drejtëpërdrejta të përpjekjes për përdorim politik të kësaj situate, në funksion të zgjedhjeve.

Tani Kosova është dhjetë vite pas, kur Serbia i thoshte “jo Policisë të Kosovës në veri” dhe shteti i Kosovës është dhjetë vite më i papjekur. Si ai që ka në krye.