Vendet e fundit në Kupën e Botës do të konfirmohen në mars 2026.
Procesi i kualifikimeve për Kupën e Botës 2026 po i afrohet fundit me dy shortet që hidhen sot për ndeshjet “play-off”.
Aktualisht, 42 kombëtare e kanë siguruar pjesëmarrjen për turneun e verës së ardhshme, i cili do të zhvillohet në tre shtete: Shtetet e Bashkuara të Amerikës, Kanada dhe Meksikë.
Në vitet e fundit, lista e plotë e pjesëmarrësve do të ishte mbyllur tashmë. Megjithatë, ky turne do të jetë i pari me 48 ekipe, që do të thotë se gjashtë ekipe më shumë do të mund të kualifikohen.
Së bashku me tre vendet organizatore dhe kampionët në fuqi Argjentinën, edhe Anglia, Brazili, Portugalia, Norvegjia, Franca dhe Senegali janë kualifikuar automatikisht. Skocia siguroi pjesëmarrjen për herë të parë që nga viti 1998 me një fitore dramatike 4-2 ndaj Danimarkës.
Ndërkohë, Kepi i Gjelbër, Curaçao, Jordania dhe Uzbekistani do të marrin pjesë për herë të parë në një Botëror.
Për ekipet që nuk arritën ta fitojnë grupin e tyre kualifikues – madje edhe disa që nuk arritën të renditeshin në dy vendet e para – ndeshjet “play-off” ofrojnë shansin e fundit për ta mbajtur gjallë ëndrrën e Kupës së Botës.
Shorti i “play-off”-eve për Kupën e Botës 2026 është paraparë të fillojë sot gjatë mesditës.
Shorti do të mbahet në selinë e FIFA-s në Cyrih, Zvicër.
Ka dy lloje ndeshjesh “play-off”: ato të UEFA-s dhe ato ndër-konfederative të FIFA-s.
Të dyja do të luhen në mars 2026. Ndërsa datat e sakta për ndeshjet ndër-konfederative ende nuk janë konfirmuar, ndeshjet e UEFA-s fillojnë me gjysmëfinalet më 26 mars dhe përfundojnë me finalet më 31 mars.
Ndeshjet e UEFA-s do të luhen me një ndeshje të vetme eliminimi, dhe shorti do të përcaktojë rrugën për secilën skuadër.
16 ekipet do të ndahen në katër grupe prej katër skuadrash, duke i lënë secilit komb dy fitore larg Kupës së Botës, përmes gjysmëfinaleve dhe më pas finales.
Vazot A deri në C do të përcaktohen bazuar në renditjen e FIFA-s. Vazoja D do t’i përmbajë katër ekipet që u kualifikuan përmes Ligës së Kombeve.
Ndeshjet ndër-konfederative do t’i vendosin katër ekipet me renditjen më të ulët në FIFA përballë njëra-tjetrës në dy ndeshje eliminimi të vetme. Fituesit do të përballen më pas me dy ekipet me renditjen më të lartë, sërish në ndeshje të vetme, dhe fituesit do të kualifikohen në Kupën e Botës.
Vendet e dyta të konfirmuara nga grupet e UEFA-s:
- Italia
- Ukraina
- Republika e Irlandës
- Polonia
- Sllovakia
- Shqipëria
- Republika Çeke
- Danimarka
- Turqia
- Uellsi
- Bosnja & Hercegovina
- Kosova
Atyre u bashkohen Rumania, Suedia, Irlanda e Veriut dhe Maqedonia e Veriut si katër ekipet më të larta në renditje nga edicioni i kaluar i Ligës së Kombeve, të cilat nuk arritën të renditeshin në dy vendet e para gjatë fazës së grupeve.
