Ndeshja mes Interit dhe Atalantës në Serinë A është mbyllur mes polemikave me barazimin 1-1 pasi zikaltërit pretendojnë se janë dëmtuar nga gjyqtari kryesor me vendimet e dhëna kundër tyre.

Por ndër të tjera, gjatë audiove të publikuar të VAR-it për momentet e diskutueshme, shfaqet edhe një bashkëbisedim i kryesorit Manganielo me Dumfris, në rastin kur ky i fundit kërkonte anulimin e golit të Atalantës pasi pretendonte për faull ndaj tij gjatë aksionit.

Në audiot e publikuara dëgjohet lojtari duke protestuar, ndërsa kryesori i kthehet: “Ke rrëshqitur, nuk e kë vënë re Denzel”. Mbrojtësi nuk e pranon këtë version. “Më kapi këmbën, si paskam rrëshqitur?”.

Dhe pastaj vjen edhe fraza e çuditshme e Manganielos. “Nuk e ke vënë re. Keni ende 10 minuta kohë që të mund të fitoni, shko”, thotë gjyqtari duke i dhënë fund protestave të futbollistit të Interit.

Një dialog i pazakontë mes një gjyqtari dhe një futbollisti, që është cilësuar skandaloz nga tifozët në rrjetet sociale të cilët mendojnë se kryesori kishte një sjellje të papërshtatshme me futbollistin në fjalë.