Të paktën një person është vrarë dhe dhjetëra të tjerë janë plagosur nga shpërthimet që kanë goditur qytetin perëndimor ukrainas Lviv herët të dielën, në atë që autoritetet e kanë cilësuar si një “sulm terrorist”.

Shpërthimet ndodhën ndërsa policia po i përgjigjej një telefonate emergjente për një ndërhyrje në një dyqan pranë qendrës së qytetit, sipas zyrës së prokurorit rajonal të Lvivit, raporton CNN, përcjell Express.

I pari ndodhi pasi policia mbërriti në vendngjarje, thuhet në njoftim, dhe u pasua nga një tjetër pas mbërritjes së një patrulle të dytë.

Një police 23-vjeçare u vra në sulm, ndërsa një makinë patrulle dhe një automjet civil u dëmtuan, tha zyra e prokurorit. Rreth dy dhjetëra persona u plagosën, sipas Policisë Kombëtare të Ukrainës.

Zyra e prokurorit rajonal të Lvivit njoftoi se ka nisur një hetim për “një akt terrorist që shkaktoi pasoja të rënda”, por shtoi se rrethanat mbeten të paqarta.

“Ky është padyshim një akt terrori,” tha kryetari i bashkisë së Lvivit, Andriy Sadovy, në një postim në Facebook.

Zyrtarët ende nuk kanë bërë të ditur se kush dyshohet se e ka kryer sulmin. Pajisje shpërthyese të improvizuara u detonuan, tha policia, duke iu referuar hetimeve të tyre “paraprake”.

Viktoria Shpylka u identifikua nga policia si efektivja e vrarë në sulm. Ajo ishte 23 vjeç.

“Kolegët e saj e kujtojnë si të ndjeshme, të zgjuar dhe të sinqertë. Ajo dinte të mbështeste, të dëgjonte dhe të gjente një fjalë të mirë edhe në ditët më të vështira,” tha policia. Shpylka ishte martuar vitin e kaluar me një oficer patrulle, thuhet në deklaratë.

Ndërkohë, kryeqyteti i Ukrainës, Kyiv, ishte nën sulme të kombinuara me raketa dhe dronë gjatë natës deri të dielën. Shpërthime u dëgjuan në qytet pas një alarmi për raketë balistike.