Kosova ka një "flotë ajrore" diku në Gjilan, sipas dy kompanive të cilat bashkë numërojnë tre veta, përfshirë pronarët, të cilët pretendojnë se kanë prodhuar një dron luftarak kamikaz që godet nga mbi një mijë kilometra largësi [gati deri në Kaliningrad të Rusisë]. Prodhimi i dronëve luftarakë s'është zanat garazhi, por kryeministri në detyrë, Albin Kurti, i ka vizituar këto dy kompani në nëntor të vitit të kaluar, duke thënë se "tash dronët luftarakë po i prodhojmë edhe vetë".

Gazeta Express

"Kosova gati të godasë nga 1000+ km largësi". Ridvan Aliu e shkroi këtë fjali në një postim në Facebook në një të diele janari, duke publikuar foto dhe video nga "testimi" i një fluturakeje që ai e quan dron luftarak dhe thotë se është prodhuar në Gjilan.

Një ngjarje e tillë do të duhej të konsiderohej ndër më të rëndësishmet për vendin, sikur të mos ishte qesharake ideja se Kosova, kështu, papritur dhe pa bujë, po hynte në një garë globale të mbrojtjes me shtetet më të fuqishme të botës.

Dyshimet, që lindën natyrshëm, çuan në zbulimin se videoja e publikuar nga "testimi" i dronit të emëruar "Skifteri K1", ishte në fakt material i një kompanie kineze. Koha.net ka raportuar se videoja ku pretendohet se paraqitet testimi i dronit kosovar, në fakt ishte copëz e një videoje të publikuar paraprakisht nga prodhuesi kinez “Hinaray”, që promovonte një fluturake.

Aliu i quajti "fake news" këto raportime, duke thënë për RTV Dukagjinin se videoja është autentike, "e ekipit jashtë Kosovës" dhe se "Skifteri K1" është "ndërtuar në Kosovë, prej studentëve tanë".

Kompanitë nga Gjilani, që pretendojnë se po prodhojnë dronë luftarakë, zyrtarisht kanë veç një punëtor.

"Subjekti për të cilin keni kërkuar ‘ALIU VENTURES’ L.L.C. (numri identifikues 812241016) ka të raportuar vetëm një punëtor në muajin 12-2025 dhe është subjekt i ri i regjistruar. Ndërsa subjekti ‘MIGA SKYSHIELD MAR’ L.L.C. (numri identifikues 812334647) nuk ka të raportuar punëtorë në sistemin e ATK-së", ka thënë Administrata Tatimore e Kosovës në një përgjigje për Koha.net.

Ridvan Aliu nga "Future Minds" dhe Muhamet Ajrullahu nga "Miga Skyshield Academy" nuk pranojnë të flasin për vendin ku, siç thonë ata, u testua "Skifteri K1".

I pyetur për numrin e punëtorëve, Aliu u përgjigj kështu në RTV Dukagjini: "Kompania jonë… përmbi 100… Kemi entitete të ndryshme, mbi 9 kompani… Tash me cilën ku punojmë, ajo është tjetër gjë".

Prodhimi i dronëve luftarakë nuk është zanat garazhi dhe kërkon zinxhir industrial si: motorë aviacioni, avionikë të certifikuar, sisteme komunikimi satelitor të mbrojtura nga ndërhyrjet, softuer fluturimi të nivelit ushtarak, testime të gjata dhe certifikime shtetërore.

Pavarësisht kësaj, kryeministri në detyrë, Albin Kurti, i ka vizituar këto dy kompani në Gjilan në nëntor të vitit të kaluar, duke thënë se vendi tashmë “po i prodhon vetë” dronët luftarakë.

"Në mbrojtje e siguri kemi investuar duke blerë nga shtetet tona mike dhe partnere dronët Bayraktar TB-2, Puma dhe së fundmi dronët kamikazë Skydagger. Tash dronët luftarakë po i prodhojmë edhe vetë. Si qeveri, edhe në nivel qendror edhe lokal, do ta mbështesim dhe përkrahim ngritjen e kapaciteteve dhe prodhimtarisë, gjersa nuk do t'i ndalim investimet për mbrojtje e siguri", shkruante ai në një postim në Facebook më 8 nëntor, pas vizitës te "kompanitë e prodhimit të dronëve luftarakë" në Gjilan.

Postimi u prit me entuziazëm. Mbi 13 mijë "likes” dhe qindra persona që e shpërndanë "lajmin e madh".

Ridvan Aliu, ndërkaq, vazhdon të pretendojë se ka krijuar tashmë një "flotë ajrore". Në një postim të fundit në Facebook, ai i fton të rinjtë që të regjistrohen përmes një vegëze online për "ndërtimin e laboratorit të Robotikës dhe Dronëve". Në krye të formularit që duhet plotësuar, shkruhet: "Trajnohu për të ndërtuar Dronë dhe Robotë me Inteligjencë Artificiale".