Manchester United gjendet në një krizë të thellë dhe presioni mbi trajnerin Ruben Amorim po rritet çdo javë. Pas humbjes së rëndë 3-0 në derbin e qytetit kundër Manchester Cityt, pozita e portugezit është vënë seriozisht në pikëpyetje.

Sipas The Mirror, bashkëpronari i klubit, Sir Jim Ratcliffe, ka fluturuar me helikopter drejt qendrës stërvitore në Carrington të enjten, për të zhvilluar bisedime të drejtpërdrejta me Amorimin. Në agjendë ishte forma zhgënjyese e skuadrës dhe diskutimi për të ardhmen e afërt të ekipit.

Aktualisht, “Djajtë e Kuq” renditen në vendin e 14-të në Premier League, me vetëm katër pikë të grumbulluara në javët e para të sezonit 2025/26. Situata është bërë edhe më e rëndë pas eliminimit befasues në raundin e dytë të Carabao Cup, ku u mposhtën nga skuadra modeste e kategorisë së katërt, Grimsby Town.

Raportet thonë se bordi i klubit i ka dhënë Amorimit një afat prej tre ndeshjesh për të kthyer situatën. Nëse rezultatet nuk përmirësohen, drejtuesit e United do të vlerësojnë seriozisht shkarkimin e tij.

Amorim, i cili zëvendësoi Erik ten Hag dhjetë muaj më parë, ka fituar vetëm 8 nga 31 ndeshjet e Premier League në drejtimin e tij. Kjo ecuri ka bërë që disa prej lojtarëve të vjetër të humbasin besimin te trajneri portugez.

Megjithatë, Amorim ka refuzuar të ndryshojë filozofinë e tij. Pas disfatës kundër Cityt, ai deklaroi:

“Ka shumë gjëra që nuk i dini për këto muaj, por unë e pranoj këtë. Nuk do të ndryshoj. Kur të dua të ndryshoj filozofinë time, do ta bëj vetë. Nëse jo, atëherë duhet të ndryshohet njeriu.”

Në rast se United vendos të shkëpusë marrëdhëniet me Amorimin, disa emra janë përfolur si kandidatë potencialë: Oliver Glasner, Gareth Southgate, Marco Silva dhe Andoni Iraola.

E ardhmja e Amorimit do të varet nga rezultatet në tre sfidat e radhës, që tashmë konsiderohen vendimtare për fatin e tij në stolin e “Djajve të Kuq”. /GazetaExpress/