Ajo që supozohej të ishte një darkë pune paqësore midis gjigantëve financiarë globalë, në margjinat e Forumit Ekonomik Botëror në Davos, u shndërrua në një shkëmbim të nxehtë pikëpamjesh midis pjesëmarrësve.

Mikpritësi ishte Larry Fink, bashkëkryetar i Forumit Ekonomik dhe CEO i Black Rock, menaxheri më i madh i fondeve në botë me asete totale që tejkalojnë 11.5 trilionë dollarë. I ftuari ishte Sekretari i Tregtisë i SHBA-së dhe teoricieni i tarifave, Howard Lutnick.

Presidentja e Bankës Qëndrore Europiane, Christine Lagarde ishte aty por u largua gjatë një fjalimi euroskeptik të Sekretarit të Tregtisë të SHBA-së, Howard Lutnick. Sipas Reuters, francezja u largua gjatë një fragmenti në të cilin Lutnick kritikoi ashpër Evropën, duke shkaktuar reagime të ashpra. Më pas, organizatorët e mbyllën eventin para ëmbëlsirës të martën në mbrëmje, sipas burimeve të njohura me çështjen, shkruan A2CNN.

Sipas Financial Times, Lutnick shkaktoi shqetësim në mesin e audiencës së tij me deklarata të tilla si bota që përqendrohej më shumë te qymyri dhe më pak te burimet e rinovueshme të energjisë. Ai gjithashtu thuhet se bëri komente përçmuese për Evropën. Një pjesëmarrës i tha gazetës se atmosfera në dhomë ishte "e tensionuar", ndërsa një tjetër e përshkroi atë si "të zhurmshme dhe pikante".

Mes atyre që thuhet se ndërprenë ishte edhe ish-nënpresidenti i SHBA-së, Al Gore. Departamenti i Tregtisë i SHBA-së deklaroi: "Vetëm një person fishkëllyeu, dhe ai ishte Al Gore."

Lutnick, folësi i fundit i mbrëmjes, sulmoi ashpër politikat evropiane të energjisë, duke e quajtur kontinentin "gjithnjë e më pak konkurrues" në skenën globale. "Ne nuk jemi këtu për të mbrojtur status quo-në, por për ta ndryshuar atë", shkroi Lutnick në një artikull në Financial Times po atë ditë, duke parashikuar tonin agresiv që ai do të mbante në Davos. Sipas burimit, kritikat e Lutnick u perceptuan si një përgjigje e drejtpërdrejtë ndaj deklaratave të bëra nga Lagarde dhe udhëheqës të tjerë evropianë, të cilët gjatë Forumit kishin mbrojtur kohezionin dhe forcën financiare të bllokut kontinental.

Ndërsa disa në publik duartrokitën, duke theksuar forcën e Shteteve të Bashkuara nën Presidentin Trump, një fraksion tjetër thuhet se u përgjigj me fishkëllima dhe mosmiratim. Lagarde, dukshëm e bezdisur, u ngrit dhe doli nga salla gjatë pjesës më të nxehtë të fjalimit. Një zëdhënës i Lutnick minimizoi incidentin, duke thënë se "vetëm një person fishkëlloi" dhe se "askush nuk doli nga salla me nxitim".

Howard Williams Lutnick është një sipërmarrës dhe drejtues biznesi amerikan, dhe ka shërbyer si Sekretar i Tregtisë i Shteteve të Bashkuara në administratën e dytë Trump që nga 21 shkurti 2025. Më parë, Lutnick ishte Drejtor Ekzekutiv dhe kryetar i Cantor Fitzgerald dhe BGC Group.

Ai ishte një kontribues i madh në fushatat presidenciale të Donald Trumpit në vitet 2020 dhe 2024. Në nëntor 2024, Presidenti i zgjedhur Trump e nominoi atë për Sekretar të Tregtisë, dhe nominimi i tij u konfirmua më pas nga Senati me një votim 51-45 më 18 shkurt 2025, duke marrë detyrën tre ditë më vonë. Ai konsiderohet teoricieni i tarifave i Trumpit.