Përfaqësuesit e platformës “Liria ka Emër”, Eliza Hoxha dhe Ismail Tasholli, sot kanë vizituar Komunën e Skenderajt dhe janë pritur nga kryetari Sami Lushtaku, bashkë me administratën komunale, të cilët kanë shprehur mbështetjen e tyre për Marshin qytetar “Drejtësi, jo politikë”, që do të mbahet më 17 shkurt në Prishtinë, në mbrojtje të drejtësisë së paanshme dhe të vlerave të luftës çlirimtare.

Gjatë këtij takimi, Hoxha dhe Tasholli kanë prezantuar aktivitetet dhe qëllimet e platformës “Liria ka Emër”, duke theksuar rëndësinë e mobilizimit qytetar për mbrojtjen e drejtësisë dhe dinjitetit kombëtar, si dhe kanë shprehur mirënjohje për mbështetjen e ofruar nga Komuna e Skenderajt.

“Ky Marsh është një thirrje qytetare për respektimin e drejtësisë së paanshme dhe për ndarjen e saj të qartë nga politika, në mbrojtje të së vërtetës historike dhe të vlerave të luftës sonë çlirimtare”, ka deklaruar Ismail Tasholli.

Ndërsa Eliza Hoxha ka theksuar se përkrahja nga komunat dhe udhëheqësit lokalë po e fuqizon këtë kauzë qytetare. “Mbështetja që po marrim nga kryetarët e komunave është dëshmi se kjo kauzë është mbi politikën ditore dhe përfaqëson një interes të përbashkët qytetar”, u shpreh ajo.

Nga ana e tij, kryetari i Komunës së Skenderajt, Sami Lushtaku, ka shprehur mbështetje të plotë për Marshin e 17 shkurtit dhe ka bërë thirrje për pjesëmarrje të gjerë qytetare.

“Ky Marsh për drejtësi dhe për çlirimtarët tanë që po mbahen në Hagë meriton përkrahjen dhe pjesëmarrjen e çdo qytetari të Kosovës”, ka deklaruar Lushtaku.

Platforma “Liria ka Emër” do të vazhdojë takimet dhe aktivitetet në të gjitha komunat e Kosovës, me synimin e mobilizimit sa më të gjerë qytetar për Marshin e 17 shkurtit në Prishtinë, nën moton “Drejtësi, jo politikë”.